អាជ្ញាធរពន្ធនាគារ បាននិយាយថា អតីតអនុប្រធានាធិបតីប្រទេសអេក្វាឌ័រលោក Jorge Glas ត្រូវបានបញ្ជូនទៅកាន់មន្ទីរពេទ្យកាលពីថ្ងៃចន្ទ បន្ទាប់ពីលោកបានធ្លាក់ខ្លួនឈឺនៅក្នុងពន្ធនាគារ ក្នុងទីក្រុង ហ្គាយ៉ាហ្គីល(Guayaquil) ប៉ុន្មានម៉ោងបន្ទាប់ពីមេធាវីរបស់លោក បានត្អូញត្អែរថា ពួកគេពុំអាចទាក់ទងលោកបាន។ លោក Glas ដែលត្រូវបានកាត់ទោសពីរដងរួចមកហើយពីបទអំពើពុករលួយ ហើយបច្ចុប្បន្ននេះកំពុងប្រឈមមុខទៅនឹងបទចោទប្រកាន់ថ្មីនោះ ត្រូវបានចាប់ខ្លួនកាលពីថ្ងៃសុក្រ ទី ៥ ខែមេសា បន្ទាប់ពីការឆ្មក់ចូលរបស់នគរបាលនៅស្ថានទូតរបស់ប្រទេសម៉ិកស៊ិក ក្នុងទីក្រុង Quito ជាកន្លែងដែលលោកបានស្នាក់នៅចាប់តាំងពីខែធ្នូ។ នៅក្នុងសេចក្តីថ្លែងការណ៍ ដែលត្រូវបានចេញផ្សាយនៅលើបណ្តាញ X ទីភ្នាក់ងារពន្ធនាគារ SNAI បាននិយាយថា លោក Glas ត្រូវបានបញ្ជូនទៅកាន់មន្ទីរពេទ្យ Naval ក្នុងទីក្រុង Guayaquil។ សេចក្តីថ្លែងការណ៍បាននិយាយថា លោក Glas បានធ្លាក់ខ្លួនឈឺ បន្ទាប់ពីមិនព្រមទទួលទានអាហារដែលបានផ្តល់ឱ្យនៅក្នុងពន្ធនាគារ ក្នុងអំឡុងពេល ២៤ ម៉ោងចុងក្រោយនេះ ប៉ុន្តែបាននិយាយថា លោកស្ថិតក្នុងស្ថានភាពមានស្ថិរភាព។

ការឆ្មក់ចូលមិនប្រក្រតីដែលនាំទៅដល់ការចាប់ខ្លួនលោក បានធ្វើឱ្យមានជម្លោះដ៏ក្តៅគគុករវាងប្រទេសទាំងពីរ បណ្តាលឱ្យប្រទេសម៉ិកស៊ិក ផ្អាកទំនាក់ទំនងផ្នែកការទូតជាមួយប្រទេសអេក្វាឌ័រ និងធ្វើឲ្យមានការរិះគន់ពីប្រទេសនៅជុំវិញតំបន់ និងនៅកន្លែងផ្សេងទៀត។

លោក Glas ជាអនុប្រធានពីឆ្នាំ ២០១៣ ដល់ឆ្នាំ២០១៧ ត្រូវបានកាត់ទោសលើកដំបូង ឱ្យជាប់ពន្ធនាគារ៦ឆ្នាំ ពីបទទទួលសំណូកពីក្រុមហ៊ុនសំណង់ប្រេស៊ីល អូដេប្រ៊ិជ(Odebrecht) ជាថ្នូរទៅនឹងកិច្ចសន្យារបស់រដ្ឋ។ លោកត្រូវបានកាត់ទោសម្តងទៀតនៅឆ្នាំ ២០២០ ពីបទប្រើប្រាស់លុយពីអ្នកទទួលកិច្ចសន្យាដើម្បីផ្តល់មូលនិធិដល់យុទ្ធនាការសម្រាប់សកម្មភាពនយោបាយរបស់ប្រធានាធិបតី លោក Rafael Correa ហើយត្រូវបានកាត់ទោសរយៈពេលប្រាំបីឆ្នាំ។

លោក Glas ដែលបានជាប់ពន្ធនាគារជាង ៤ ឆ្នាំ មុនពេលត្រូវបានដោះលែងនៅឆ្នាំ ២០២២ បានចោទប្រកាន់ជាយូរមកហើយថា បទចោទប្រកាន់ទាំងនេះគឺមានហេតុផលនយោបាយ ជាបទចោទប្រកាន់ដែលរដ្ឋអាជ្ញាបានបដិសេធ។ បច្ចុប្បន្ននេះ លោកប្រឈមមុខទៅនឹងការចោទប្រកាន់ពីបទប្រើប្រាស់មូលនិធិមិនត្រឹមត្រូវ ដែលប្រមូលបានដើម្បីជួយដល់ការកសាងឡើងវិញ ខេត្ត Manabi បន្ទាប់ពីគ្រោះរញ្ជួយដីដ៏មហន្តរាយកាលពីឆ្នាំ ២០១៦។