ប្រភពព័ត៌មានយោធារបស់ប្រទេសលីបង់ បាននិយាយថា ការវាយប្រហារតាមអាកាសរបស់អ៊ីស្រាអែល ទៅលើភាគខាងត្បូងប្រទេសលីបង់ កាលពីថ្ងៃចន្ទ បានសម្លាប់មេបញ្ជាការតំបន់ម្នាក់ និងសមាជិកបីនាក់ផ្សេងទៀតនៃក្រុមហេសបូឡានិកាយស៊ីអ៊ីតរបស់ប្រទេសលីបង់។ ប្រភពព័ត៌មានបាននិយាយថា ការវាយប្រហារតាមអាកាសមួយផ្សេងទៀត បានដាក់គោលដៅទៅលើភូមិ Kafr Kila នៅភាគអាគ្នេយ៍ ដោយបានសម្លាប់អ្នកប្រយុទ្ធក្រុមហេសបូឡាម្នាក់ បំផ្លាញលំនៅឋានប្រាំខ្នងទាំងស្រុង និងខូចខាត ១៨ ខ្នងផ្សេងទៀត។ យោងតាមប្រភពព័ត៌មានបានឲ្យដឹងថា អ៊ីស្រាអែល បានធ្វើការវាយប្រហារតាមអាកាសចំនួនបីលើក កាលពីព្រឹកថ្ងៃចន្ទ ទៅលើក្រុង និងភូមិចំនួនបី នៅព្រំដែនភាគខាងកើត និងភាគកណ្តាល។ អ៊ីស្រាអែលក៏បានបាញ់ផ្លោងចំនួន ៤៥ គ្រាប់ ទៅលើទីប្រជុំជន និងភូមិចំនួន ១០ នៅភាគខាងកើត ភាគកណ្តាល និងភាគខាងលិចនៃតំបន់ព្រំដែននៅភាគខាងត្បូងប្រទេសលីបង់។

ទន្ទឹមនឹងនេះ ក្រុមហេសបូឡា បាននិយាយថា ក្រុមអ្នកប្រយុទ្ធរបស់ខ្លួន បានវាយប្រហារទីតាំងរបស់អ៊ីស្រាអែលជាច្រើនកន្លែង នៅជិតព្រំដែនប្រទេសលីបង់-អ៊ីស្រាអែល។ ប្រធានកងកម្លាំងបណ្តោះអាសន្នរបស់អង្គការសហប្រជាជាតិនៅប្រទេសលីបង់ លោក អារ៉ុលដូ ឡាហ្សារ៉ូ សាអេន(Aroldo Lazaro Saenz) និងអ្នកសម្របសម្រួលពិសេសរបស់អង្គការសហប្រជាជាតិសម្រាប់ប្រទេសលីបង់ លោក ចូនណា រ៉ុនណេកា(Joanna Wronecka) បានចេញសេចក្តីថ្លែងការណ៍រួមមួយដោយអំពាវនាវឲ្យប្រទេសលីបង់ និងអ៊ីស្រាអែល ប្តេជ្ញាចិត្តឡើងវិញចំពោះការបញ្ឈប់អរិភាពក្រោមក្របខណ្ឌនៃសេចក្តីសម្រេចលេខ ១៧០១ ដើម្បីបញ្ចៀសការរីកធំជម្លោះបន្ថែមទៀត ដោយនិយាយថា នៅមានចន្លោះសម្រាប់ផ្នែកការទូត។ ភាពតានតឹងនៅតាមបណ្តោយព្រំដែនលីបង់-អ៊ីស្រាអែល បានកើនឡើងកាលពីថ្ងៃទី ៨ ខែតុលា ឆ្នាំ ២០២៣ បន្ទាប់ពីការបាញ់ឃាំងគ្រាប់រ៉ុក្កែតបាញ់ដោយក្រុមប្រដាប់អាវុធហេសបូឡាលីបង់ ឆ្ពោះចូលទៅប្រទេសអ៊ីស្រាអែល ក្នុងសាមគ្គីភាពជាមួយការវាយប្រហាររបស់ក្រុមហាម៉ាស លើអ៊ីស្រាអែល។ បន្ទាប់មក អ៊ីស្រាអែលបានសងសឹកដោយការបាញ់កាំភ្លើងធំ ទៅកាន់ភាគអាគ្នេយ៍ប្រទេសលីបង់។