ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីណែនាំមួយ ដល់ម្ចាស់ ឬ​នាយក​រោងចក្រ​ទាំងអស់ ឲ្យយកចិត្តទុកដាក់អនុវត្តនូវវិធានការបន្ទាន់ ដោយអាកាស​ធាតុ​នា​រដូវ​ប្រាំង​ឆ្នាំ​នេះ​កើនកម្ដៅ។

នៅក្នុងសេចក្តីណែនាំស្តីពី វិធានការអនុវត្តបន្ទាន់​នៅ​តាម​រោងចក្រ​ក្នុង​អំឡុង​ពេល​អាកាស​ធាតុ​ក្តៅ ​ចេញផ្សាយនៅរសៀលថ្ងៃទី៩ មេសា ឆ្នាំ២០២៤នេះ ក្រសួងការងារ និងបណ្តុះ​បណ្តាល​វិជ្ជាជីវៈ​ បានបញ្ជាក់ថា ដោយអាកាសធាតុនារដូវប្រាំងនេះកើនកម្ដៅ ម្ចាស់ ឬនាយក​រោង​ចក្រ​ទាំង​អស់​ សូមយកចិត្តទុកដាក់អនុវត្តនូវវិធានការបន្ទាន់ មានដូចជា៖ ១.ត្រូវបើកទ្វារបង្អួចទាំងអស់ ឬបន្ថែមកង្ហារបញ្ចេញខ្យល់ ឬបឺតខ្យល់ចេញក្នុងអគារធ្វើការ។ ២.ត្រូវបង្កើនការផ្គត់ផ្គង់ទឹកស្អាតសម្រាប់ពិសាដល់កម្មករនិយោជិត និងណែនាំឱ្យពិសាទឹកឱ្យបានច្រើន និងញឹកញាប់យ៉ាងតិច ២លីត្រក្នុងមួយថ្ងៃ ទោះបីមិនស្រេកទឹកក៏ដោយ។ ៣. ត្រូវបាញ់ទឹកនៅលើដំបូលអគារធ្វើការឱ្យបានយ៉ាងតិច ២ដងក្នុងមួយថ្ងៃ និងត្រូវចាត់វិធានការចាំបាច់ផ្សេងៗទៀត ដើម្បីកាត់បន្ថយកម្ដៅជាបន្ទាន់។ ៤.ត្រូវពិនិត្យប្រព័ន្ធបញ្ចេញបញ្ចូលខ្យល់ទាំងអស់នៅតាមអគារធ្វើការ ដើម្បីធានាថា ដំណើរការល្អ និងត្រូវបើកឱ្យដំណើរការយ៉ាងតិច ១ម៉ោង មុនឱ្យកម្មករនិយោជិតចូលធ្វើការ។ និងទី៥. ត្រូវចាត់បុគ្គលិកទទួលបន្ទុក ត្រួតពិនិត្យឧបករណ៍វាស់ស្ទង់កម្ដៅជាប្រចាំ នៅកន្លែងធ្វើការ។

ក្រសួងការងារ និងបណ្តុះបណ្តាលវិជ្ជាជីវៈ សង្ឃឹមយ៉ាងមុតមាំថា ម្ចាស់ ឬនាយក​រោង​ចក្រ​ទាំង​អស់នឹងចូលរួមអនុវត្តតាមសេចក្តីណែនាំនេះឱ្យបានម៉ឺងម៉ាត់ប្រកបដោយប្រសិទ្ធភាព ក្នុងស្មារតីទទួលខុសត្រូវខ្ពស់៕ អត្ថបទ៖ ឈិត បូរ៉ាវី