ព្រៃវែង៖ សង្រ្កាន្តស្រុកកំចាយមារ ត្រូវបានរៀបចំធ្វើនៅសាកលវិទ្យាល័យជាតិជាស៊ីមកំចាយមារ នៅថ្ងៃទី៨ខែមេសានេះ ដោយបានបង្កើតកម្មវិធីសប្បាយរីករាយ ទាំងបុរាណ និងសម័យ ក្រោម​ការ​ចូលរួមពីសិស្សនិស្សិតប្រមាណជាង២ម៉ឺននាក់ ដោយបរិយាកាសរីករាយ ។

ក្រោមការយកចិត្តទុកដាក់របស់របស់សម្ដេចចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃ កម្ពុជាបំផុសស្មារតីថែរក្សាប្រពៃណីជាតិ ល្បែងប្រជាប្រិយខ្មែរឱ្យបានគង់វង្ស និងបង្ក​បរិយាកាស​រីករាយ​ក្នុង​ឱកាសពិធីបុណ្យចូលឆ្នាំថ្មីប្រពៃណីជាតិ សម្ដេចបានជំរុញឱ្យគ្រប់រដ្ឋបាលរាជធានីខេត្ត ជំរុញ​ឱ្យមានការរៀបចំសង្ក្រាន្តនៅតាមភូមិឃុំសង្កាត់ទីប្រជុំជន តាមក្រសួងស្ថាប័ន វត្តអារាម សាលារៀ​នទៅតាមលទ្ធភាពដែលអាចទៅបាន​ដើម្បីផ្ដល់ការកម្សាន្តជូនប្រជាជន និង​សិស្ស​និស្សិត។

កម្មវិធីសង្ក្រាន្តឆ្នាំថ្មី ស្រុកកំចាយមារ ខេត្តព្រៃវែង បានរៀបចំក្រោមអធិបតីភាពពីឯកឧត្តម ខៀវ ភារិទ្ធ រដ្ឋលេខាធិការក្រសួងមហាផ្ទៃ និងជាប្រធាន ស.ស.យ.ក ខេត្តព្រៃវែង អភិបាល​ស្រុក​កំចាយ​មារ សហការពីសាកលវិទ្យាល័យជាតិជាស៊ីមកំចាយមារ ក្រុមការងារ​ចុះជួយ​សហភាព​សហព័ន្ធ​យុវជន​ស្រុកកំចាយមារ រៀបចំកម្មវិធីសង្រ្កានឆ្នាំថ្មី បំផុសស្មារតីយុវជន ពលរដ្ឋ​ឱ្យ​ចូល​រួម​លើក​កម្ពស់​តម្លៃវប្បធម៌ជាតិ សិល្បៈបុរាណរបស់ខ្មែរឱ្យបានគង់រង្ស ។

នាឱកាសបើកកម្មវិធីសង្ក្រាន្ត ឯកឧត្តម ខៀវ ភារិទ្ធ បានមានប្រសាសន៍ថា នេះជាលើកដំបូង​ដែល ​ស.ស.យ.ក ខេត្តព្រែវែង ក្រុមការងារ ស.ស.យ.ក ចុះជួយមូលដ្ឋានស្រុកកំចាយមារ បាន​រៀប​ចំ​សង្ក្រាន្ត​ឆ្នាំថ្មីកាន់តែធំជាងរាល់ឆ្នាំ គឺពិតជាបានចូលរួមចំណែកក្នុងការថែរក្សា និងអភិរក្ស​នូវ​សម្បត្តិ​វប្បធម៌របស់ខ្មែរ ព្រោះសង្ក្រាន្តនេះ មានកម្មវិធីសប្បាយៗជាច្រើន ការលេង​ល្បែង​ប្រជាប្រិយ​ ការសម្ដែងរបាំត្រុដិ ជារបាំប្រពៃណីខ្មែរ នាំមកសេចក្តីសុខ នាំមកលាភជ័យ បណ្ដេញ​ឧបទ្រុព​ចង្រៃ។

ឯកឧត្តមបានលើកទឹកចិត្តដល់បណ្ដាស្រុកផ្សេងៗទៀត រៀបចំកម្មវិធីសង្រ្កាននេះទៅតាមលទ្ធ ភាព​ដែលអាចធ្វើទៅបាន ដើម្បីផ្ដល់ភាពរីករាយដល់ពលរដ្ឋ ក៏ដូចជាយុវជនបន្តវេន ក្នុង​ការ​ថែ​រក្សា​ប្រពៃណីជាតិ និងក៏ឱ្យសិស្សនិស្សិត អាចរំសាយ​អារម្មណ៍រ​បស់​ពួក​គេ​ក្រោយ​សម្រា​ក​ពី​ការ​សិក្សា​។

អភិបាលស្រុកកំចាយមារ លោក ប៊ិន ជីវ័ន្ត និងសាកលវិទ្យាធិការសាកលវិទ្យាល័យជាតិជាស៊ីម កំចាយមារ លោក សិទ្ធ ខន បានលើកទ្បើងស្វាគមន៍ក្រុមការងារចុះជួយមូលដ្ឋានស្រុកកំចាយមារ ដែលបានសហការរៀបចំកម្មវិធីសង្រ្កាន្តនេះទ្បើង ផ្ដល់ភាព​រីករាយ​ជូន​សិស្ស​និស្សិត​សប្បាយ​រីករាយឆ្នាំនេះការ រៀបចំមានលក្ខណៈធំជាងឆ្នាំមុន។

លោក ម៉េង ហ៊ុយ ប្រធានក្រុមការងារចុះជួយស.ស.យ.ក ស្រុកកំចាយមារ បានលើកទ្បើងថា ឆ្នាំ នេះ ស.ស.យ.ក ខេត្តព្រៃវែង ក្រុមការងារចុះជួយមូលដ្ឋានស្រុកកំចាយមារ បាន​សហការ​គ្នា​រៀប​ចំ​កម្ម​វិធីនេះទ្បើង និងបានរៀបចំជាស្ដង់តាំងបង្ហាញផលិតផលក្នុងឃុំទាំង៨ នៅមូលដ្ឋាន​ស្រុក​កំចាយ​មារ ដើម្បីផ្សព្វផ្សាយពីស្នាដៃ និងគាំទ្រផលិតផលខ្មែរ លើកកម្ពស់​ជីវភាព​ពលរដ្ឋ​នៅ​មូលដ្ឋាន៕ អត្ថបទ៖ ពេញ សុភ័ក្រ្ត