អ្នកស្រុក ក្រុមគ្រួសារ និងមិត្តភ័ក្តិរបស់ជនរងគ្រោះក្នុងហេតុការណ៍បាក់ស្ពាន បាល់ទីម័រ (Baltimore) ដែលបានកើតឡើងជិតពីរសប្តាហ៍មុន បានប្រារព្ធពិធីបួងសួង និងដង្ហែភ្លើងទៀនកាលពីថ្ងៃចន្ទ (ទី៨ ខែមេសា) ដើម្បីរលឹកវិញ្ញាណក្ខន្ធដល់ជនរងគ្រោះ។

ជនរងគ្រោះទាំង ៦ នាក់ក្នុងហេតុការណ៍បាក់ស្ពាននោះ សុទ្ធតែជាជនអន្តោប្រវេសន៍មកពីម៉ិកស៊ិក និងអាមេរិកកណ្តាល ដែលកំពុងជួសជុលរណ្តៅលើផ្ទៃផ្លូវនៃស្ពាន នៅពេលដែលវាបានបាក់កាលពីព្រឹកព្រលឹមថ្ងៃទី២៦ ខែមីនា។

ក្នុងអំឡុងពេលប្រារព្ធពិធី មនុស្សម្នាបានកាន់ឈើឆ្កាងចំនួនប្រាំមួយ ដែលមានឈ្មោះជនរងគ្រោះ និងទង់ជាតិនៃប្រទេសកំណើតរបស់ពួកគេ។

កាលពីថ្ងៃទី២៦ ខែមីនា កប៉ាល់ដឹកទូរកុងតឺន័រ ដាលី (Dali) កំពុងធ្វើដំណើរចេញពីកំពង់ផែ បាល់ទីម័រ តាមដងទន្លេ ផាថាបស្កូ (Patapsco) ក្នុងដំណើរឆ្ពោះទៅប្រទេសស្រីលង្កា។ នៅម៉ោង ១:២៤ នាទីព្រឹកព្រលឹម កប៉ាល់នោះបានដាច់ចរន្តអគ្គិសនី ហើយភ្លើងទាំងអស់របស់វារលត់មិនអាចគ្រប់គ្រងបាន។

បីនាទីក្រោយមកនៅម៉ោង ១:២៧ នាទីព្រឹកដដែលនោះ កប៉ាល់បានបុកបង្គោលស្ពាន ហើយស្ទើរតែរចនាសម្ព័ន្ធទាំងមូលនៃវិសាលភាពស្ពានបានដួលរលំចូលទៅក្នុងទឹកក្នុងរយៈពេលត្រឹមតែប៉ុន្មានវិនាទី៕