អតីតឧត្តមសេនីយវ៉េណេហ្ស៊ុយអេឡាម្នាក់ដែលមានទំនាក់ទំនងជិតស្និទ្ធជាមួយអតីតប្រធានាធិបតីឆ្វេងនិយមលោក Hugo Chavez ត្រូវបានកាត់ទោសឲ្យជាប់ពន្ធនាគារជាង ២១ឆ្នាំ នៅក្នុងសហរដ្ឋអាមេរិក កាលពីថ្ងៃចន្ទពីបទផ្គត់ផ្គង់អាវុធដល់ក្រុមឧទ្ទាមកងកម្លាំងប្រដាប់អាវុធបដិវត្តន៍កូឡុំប៊ី(FARC)។

លោក Cliver Alcala មានវ័យ៦២ឆ្នាំ បានសារភាពកំហុសកាលពីខែមិថុនា ឆ្នាំមុនចំពោះពីរករណីនៃការ   ផ្តល់ជំនួយសម្ភារៈដល់ក្រុមភេរវករ និងការបញ្ជូនអាវុធខុសច្បាប់។ សហរដ្ឋអាមេរិក បានចាត់ទុកក្រុម ឧទ្ទាម FARC ដែលបានរំសាយនៅឆ្នាំ២០១៦ ជាផ្នែកនៃកិច្ចព្រមព្រៀងសន្តិភាពជាប្រវត្តិសាស្ត្រ ជាមួយ   រដ្ឋាភិបាលរបស់ប្រទេសកូឡុំប៊ីថា ជាក្រុមភេរវករ។

ចៅក្រមសហព័ន្ធអាមេរិក លោក Alvin Hellerstein បានប្រកាសទោសនេះ នៅក្នុងសវនាការ នៅតុលាការសហព័ន្ធ Manhattan។

លោក Alcala គឺជាមនុស្សដំបូងដែលត្រូវបានកាត់ទោសពីសហចុងចោទ៥នាក់របស់ប្រធានាធិបតីវ៉េណេហ្ស៊ុយអេឡាបច្ចុប្បន្ន លោក នីកូសឡាស ម៉ាឌូរ៉ូ (Nicolas Maduro) ដែលត្រូវបានចោទប្រកាន់ពីបទ«អំពើភេរវកម្ម» ក្នុងឆ្នាំ ២០២០។ លោកម៉ាឌូរ៉ូ ជាសត្រូវរបស់សហរដ្ឋអាមេរិកយូរឆ្នាំមកហើយ និងជាអ្នកការពារលោកChavez ដែលបានគ្រប់គ្រងការដួលរលំនៃសេដ្ឋកិច្ចនៅវ៉េណេហ្ស៊ុយអេឡា ដែលផលិតប្រេង បានបដិសេធការចោទប្រកាន់ទាំងនេះ។

រដ្ឋអាជ្ញាសហព័ន្ធ បានស្នើសុំឲ្យជាប់ទោស ៣០ឆ្នាំ សម្រាប់លោកAlcala។

ពួកគេ បានអះអាងថា បន្ថែមពីលើការផ្គត់ផ្គង់អាវុធកម្រិតយោធាដល់ក្រុមឧទ្ទាម FARC លោក Alcala បានទទួលសំណូករាប់លានដុល្លារសម្រាប់ការការពារការដឹកជញ្ជូនកូកាអ៊ីនរបស់ក្រុមនេះពីការជ្រៀតជ្រែក ដោយយោធាវ៉េណេហ្ស៊ុយអេឡា។