ក្រោមសម្ពាធរបស់សហរដ្ឋអាមេរិកក្នុងការជំរុញការចំណាយលើវិស័យការពារជាតិ ប្រទេសកាណាដា កាលពីថ្ងៃចន្ទ បានសន្យាថា នឹងផ្តល់ប្រាក់រាប់ពាន់លានបន្ថែមទៀតសម្រាប់កងកម្លាំងប្រដាប់អាវុធ ហើយបានបញ្ជាក់ថា ការចំណាយយោធា នឹងខិតទៅជិតគោលដៅរបស់ណាតូ នៅឆ្នាំ ២០៣០។

នៅក្នុងការធ្វើបច្ចុប្បន្នភាពគោលនយោបាយការពារជាតិ រដ្ឋាភិបាលសេរីនិយមរបស់លោកនាយករដ្ឋមន្ត្រី ចាស្ទីន ទ្រូដូ (Justin Trudeau) បាននិយាយថា ការការពារតំបន់អាក់ទិក ក៏ដូចជាការដោះស្រាយបញ្ហាប្រឈមនានាពីរុស្ស៊ី និងចិន មានន័យថា ទីក្រុងអូតាវ៉ា ( Ottawa) ត្រូវធ្វើបន្ថែមទៀត។

លោកបានប្រាប់អ្នកយកព័ត៌មានថា៖«យើងកំពុងបង្កើនបន្តិចៗម្តង ដើម្បីការពារ និងការពារសណ្តាប់ធ្នាប់ផ្អែកលើច្បាប់ដែលបានអនុញ្ញាតឲ្យមនុស្សជុំវិញពិភពលោក មានការរីកចម្រើន»។

ការចំណាយលើផ្នែកយោធា ត្រូវបានកំណត់ថា នឹងកើនឡើងដល់ ១,៧៦ភាគនៃផលិតផលក្នុងស្រុកសរុបរបស់ខ្លួននៅឆ្នាំ ២០៣០ ដែលនៅតែតិចជាងគោលដៅ ២ភាគរយដែលអង្គការណាតូកំណត់សម្រាប់សមាជិក ប៉ុន្តែកើនឡើងពី១,៤ភាគរយនាពេលបច្ចុប្បន្ន។ ក្រុមមន្ត្រី បានប្រាប់អ្នកយកព័ត៌មានថាមិនមានកាលបរិច្ឆេទគោលដៅ ដើម្បីឈានដល់ចំនួនកំណត់ ២ភាគរយនោះទេ។

ពុំទាន់ច្បាស់ដែរថាតើចំនួនប៉ុន្មាននៃកម្មវិធីនេះ នឹងត្រូវបានដាក់ឲ្យចូលជាធរមាន ចាប់តាំងពីការស្ទង់មតិបង្ហាញថា ក្រុមសេរីនិយមតាមពីក្រោយគណបក្សអភិរក្សដែលជាគណបក្សប្រឆាំងផ្លូវការ មុនការបោះឆ្នោតដែលត្រូវតែធ្វើឡើង នៅចុងខែតុលា ឆ្នាំ ២០២៥។

សហរដ្ឋអាមេរិក ដែលបានពឹងលើកាណាដាអស់រយៈពេលជាច្រើនឆ្នាំ ដើម្បីជំរុញការចំណាយលើវិស័យការពារជាតិ បានស្វាគមន៍ការធ្វើបច្ចុប្បន្នភាពនេះ។