អនុរដ្ឋមន្ត្រីក្រសួងរតនាគារអាមេរិក លោក Wally Adeyemo កាលពីថ្ងៃចន្ទ (ទី៨ ខែមេសា) បាននិយាយ ថា ក្រសួងមានក្ដីបារម្ភថា ក្រុមភេរវករនឹងបង្កើនការប្រើប្រាស់រូបិយប័ណ្ណនិម្មិត និងទ្រព្យសកម្មឌីជីថលផ្សេងទៀត ប្រសិនបើសភាមិនអនុម័តវិធានការនិយតកម្មថ្មីនោះទេ។

នៅក្នុងសក្ខីកម្មដែលបានរៀបចំត្រៀមសម្រាប់សវនាការរបស់គណៈកម្មាធិការធនាគារ លំនៅឋាន និងកិច្ចការទីក្រុងរបស់ព្រឹទ្ធសភា នៅថ្ងៃអង្គារ (ទី៩ ខែមេសា) នេះ លោក Adeyemo បានព្រមានថា បណ្ដាក្រុម ដូចជាក្រុមអាល់កៃដា ក្រុមហាម៉ាស និងសូម្បីតែក្រុមនៅរដ្ឋនានា ដូចជារុស្ស៊ី និងកូរ៉េខាងជើងជាដើម កំពុងស្វែងរកវិធីថ្មី ដើម្បីលាក់អត្តសញ្ញាណរបស់ពួកគេ និងផ្ទេរធនធាន ដោយប្រើប្រាស់រូបិយប័ណ្ណនិម្មិត។

ជាមួយគ្នានេះ លោកបាននិយាយថា ក្រសួងរតនាគារបានបង្ហាញពីភាពជោគជ័យមួយចំនួន ក្នុងការលុបបំបាត់ហិរញ្ញវត្ថុខុសច្បាប់ នៅក្នុងប្រព័ន្ធអេកូឌីជីថល ប៉ុន្តែបាននិយាយថា សហរដ្ឋអាមេរិកត្រូវការពង្រីកការអនុវត្តបន្ថែមទៀត ដើម្បីការពារសកម្មភាពបែបនេះរបស់ «ក្រុមខិលខូច»។

នៅក្នុងការកត់សម្គាល់ត្រៀមនោះ លោក Adeyemo បាននិយាយថា៖ «ទោះបីជាយើងបន្តវាយតម្លៃថា ពួកភេរវករចូលចិត្តប្រើប្រាស់ផលិតផល និងសេវាកម្មហិរញ្ញវត្ថុបែបប្រពៃណីក៏ដោយ ក៏យើងមានក្ដីបារម្ភថា បើគ្មានវិធានការរបស់សភាដើម្បីផ្តល់ឲ្យយើងនូវវិធានការចាំបាច់នោះទេ ការប្រើប្រាស់ទ្រព្យសម្បត្តិនិម្មិតដោយក្រុមទាំងនេះនឹងកើនឡើង»៕