ក្រសួងយុត្តិធម៌អាមេរិក កាលពីថ្ងៃចន្ទ (ទី៨ ខែមេសា) បានច្រានចោលការទាមទាររបស់គណបក្សសាធារណរដ្ឋនៅក្នុងសភាតំណាងរាស្ត្រ ដែលចង់ឲ្យប្រគល់នូវខ្សែអាត់សំឡេងនៃបទសម្ភាសន៍របស់ប្រធានាធិបតីលោក Joe Biden ជាមួយរដ្ឋអាជ្ញាពិសេស ដោយរបាយការណ៍សួរសំណួរអំពីការចងចាំរបស់មេដឹកនាំអាមេរិករូបនេះ បានធ្វើឲ្យមានការឡើងកម្ដៅខាងនយោបាយ។

គួរបញ្ជាក់ថា រដ្ឋអាជ្ញាពិសេសលោក Robert Hur បានធ្វើឲ្យសមាជិកសភារបស់គណបក្សសាធារណរដ្ឋខឹងសម្បា ដោយការសម្រេចមិនបន្តបទចោទប្រកាន់ព្រហ្មទណ្ឌប្រឆាំងនឹងលោក Biden ដែលជាសមាជិករបស់គណបក្សប្រជាធិបតេយ្យ ពាក់ព័ន្ធនឹងការរក្សាឯកសារសម្ងាត់ ដែលមានតាំងពីសម័យលោកធ្វើជាអនុប្រធានាធិបតីក្រោមការដឹកនាំរបស់លោក Barack Obama។ តែក្រសួងបានចោទប្រកាន់បេក្ខជនប្រធានាធិបតីមកពីគណបក្សសាធារណរដ្ឋលោក Donald Trump ពីបទរក្សាឯកសារសម្ងាត់នេះ បន្ទាប់ពីលោកបានចាកចេញពីសេតវិមាន។

ពាក់ព័ន្ធនឹងករណីនេះ ជំនួយការរដ្ឋមន្ត្រីក្រសួងយុត្តិធម៌លោក Carlos Uriarte បាននិយាយថា ក្រសួងបានផ្តល់ព័ត៌មានទាំងអស់ហើយតាមការស្វែងរកនៅក្នុងដីកាកោះហៅចូលតុលាការរបស់សភា ក្នុងនោះរួមទាំងបទសម្ភាសន៍ដែលបានចម្លងមួយចំនួនពីការស៊ើបអង្កេតរបស់លោក Hur ផងដែរ។

នៅក្នុងលិខិតមួយផ្ញើទៅកាន់ប្រធានគណៈកម្មាធិការតុលាការសភា លោក Jim Jordan និងប្រធានគណៈកម្មាធិការត្រួតពិនិត្យសភា លោក James Comer លោក Uriarte បានសរសេរថា៖ «គណៈកម្មាធិការបានឆ្លើយតប ដោយការបណ្ដោយឲ្យកើនឡើងជម្លោះ និងការគំរាមកំហែងប្រព្រឹត្តិបទល្មើសព្រហ្មទណ្ឌ។ យើងសូមជំរុញឲ្យគណៈកម្មាធិការបញ្ចៀសជម្លោះ ជាជាងស្វែងរកជម្លោះ»។

សមាជិកសភាមកពីគណបក្សសាធារណរដ្ឋបានគំរាមឃុំខ្លួនរដ្ឋមន្ត្រីក្រសួងយុត្តិធម៌ លោក Merrick Garland ប្រសិនបើក្រសួងមិនប្រគល់កំណត់ត្រាទាំងអស់ដែលពួកគេកំពុងស្វែងរកនោះទេ៕