លទ្ធផលចុងក្រោយនៅក្នុងការបោះឆ្នោតរដ្ឋបាលមូលដ្ឋានរបស់ប្រទេសប៉ូឡូញ កាលពីថ្ងៃចន្ទ (ទី៨ ខែមេសា) បានបង្ហាញថា គណបក្សប្រឆាំងជាតិនិយម គឺគណបក្សច្បាប់ និងយុត្តិធម៌ (PiS) ទទួលបានសំឡេងគាំទ្រច្រើនពីប្រជាជន ដែលលទ្ធផលនេះ គឺជាផលប៉ះពាល់ដល់មហិច្ឆតារបស់នាយករដ្ឋមន្ត្រីលោក Donald Tusk ក្នុងការពង្រឹងការក្ដោបក្តាប់អំណាចរបស់លោក។

ទោះបីជាលោក Tusk មិនជោគជ័យក្នុងការដឹកនាំក្រុមចម្រុះ គឺគណបក្ស KO របស់លោកឲ្យទទួលបានចំណាត់ថ្នាក់ទី១ ក្នុងការបោះឆ្នោតដោយឯករាជ្យពីដៃគូរបស់ខ្លួននៅក្នុងសម្ព័ន្ធភាពដែលកំពុងកាន់អំណាចក៏ដោយ ក៏គណបក្សនេះនឹងនៅតែគ្រប់គ្រងអាសនៈក្រុមប្រឹក្សាក្នុងតំបន់ច្រើនជាងគណបក្ស PiS ដដែល។

ការបោះឆ្នោតនេះត្រូវបានឃ្លាំមើលយ៉ាងដិតដល់ នៅក្នុងទីក្រុងប្រ៊ុចសែល មុនការបោះឆ្នោតសភាអឺរ៉ុប ក្នុងខែមិថុនា នៅពេលដែលការស្ទង់មតិមតិទូទាំងទ្វីបអឺរ៉ុប បង្ហាញថា ក្រុមប្រជានិយមនឹងធ្វើបានល្អ។

យោងតាមលទ្ធផលចុងក្រោយពីគណៈកម្មការរៀបចំការបោះឆ្នោត បានឲ្យដឹងថា គណបក្ស PiS ទទួលបានសន្លឹកឆ្នោតច្រើនជាងគេ ដោយឈ្នះសំឡេង ៣៤,២៧ភាគរយ ហើយឥឡូវនេះគ្រប់គ្រងក្រុមប្រឹក្សាចំនួន៧ ក្នុងចំណោមក្រុមប្រឹក្សាថ្នាក់តំបន់ចំនួន១៦។ គណបក្ស KO ដែលជាក្រុមធំជាងគេនៅក្នុងរដ្ឋាភិបាលចម្រុះដែលកំពុងកាន់អំណាច មានសំឡេងឆ្នោត ៣០,៥៩ភាគរយ ប៉ុន្តែគ្រប់គ្រងក្រុមប្រឹក្សាតំបន់ចំនួន៩។

ការនាំមុខរបស់គណបក្ស PiS ទាក់ទងនឹងចំណែកគ្រប់គ្រងនៃការបោះឆ្នោតនេះ គឺមានចំនួនច្រើនជាងការព្យាករណ៍នៅក្នុងការស្ទង់មតិចេញពីមណ្ឌលបោះឆ្នោត កាលពីថ្ងៃអាទិត្យចុងសប្ដាហ៍កន្លងមក។ តែយ៉ាងណាក្ដី ក្រុមគណបក្សទាំង៣ ដែលបង្កើតរដ្ឋាភិបាលចម្រុះ ទទួលបានសំឡេងឆ្នោតច្រើនជាង ៥០ភាគរយ ពេលបូកបញ្ចូលគ្នា៕