ពលរដ្ឋបង់ក្លាដែសរាប់ម៉ឺននាក់ បានប្រញាប់ប្រញាល់ចាកចេញពីរដ្ឋធានី Dhaka ធ្វើដំណើរទៅកាន់ស្រុកកំណើត ដើម្បីប្រារព្ធពិធីបុណ្យ Eid al-Fitr ជាមួយក្រុមគ្រួសាររបស់ពួកគេ ។

នៅក្នុងឆ្នាំនេះ ពិធីបុណ្យ Eid al-Fitr នៅប្រទេសបង់ក្លាដែស បានចាប់ផ្តើមកាលពីថ្ងៃអាទិត្យ ហើយនិងបញ្ចប់ទៅវិញនៅថ្ងៃអាទិត្យខាងមុខនេះ ពោលគឺវាមានរយៈពេល ៨ថ្ងៃ ។

រដ្ឋធានី Dhaka គឺជាកន្លែងការងារសម្រាប់ពលរដ្ឋប្រហែល ២២,៤លាននាក់ ហើយការប្រញាប់ប្រញាល់ធ្វើដំណើរទៅស្រុកកំណើត ដើម្បីប្រារព្ធពិធីបុណ្យមូស្លីមធំបំផុតប្រចាំឆ្នាំ តែងតែបង្កឲ្យកើតមានការធ្វើដំណើរប្រកបដោយហានិភ័យ ដោយសារតែនាវាចម្លង រថយន្តក្រុង និងរថភ្លើងផ្ទុកមនុស្សលើសចំណុះ ។

ខណៈពេលនោះដែរ មនុស្សរាប់លាននាក់ បានសម្រុកចាកចេញពីរដ្ឋធានីហ្សាកាតា ប្រទេសឥណ្ឌូនេស៊ី ធ្វើដំណើរទៅកាន់ស្រុកកំណើតរបស់ពួកគេ ដើម្បីប្រារព្ធពិធីបុណ្យ Eid al-Fitr ក្នុងសប្តាហ៍នេះ។

រូបភាពពីយានដ្រូនកាលពីថ្ងៃច័ន្ទ ឃើញរថយន្តរាប់ពាន់គ្រឿងកំពុងតម្រង់ រង់ចាំនាវាចម្លង ខណៈរថយន្តជាច្រើនគ្រឿងទៀត កំពុងធ្វើដំណើរតាមផ្លូវឆ្ពោះទៅកាន់កំពង់ផែ ដែលលាតសន្ធឹងឆ្ងាយនៅខាងក្រៅផែ Merak ។ 

គួរឲ្យដឹងថា ប្រជាជនរស់នៅក្នុងទីក្រុងហ្សាកាតា ដែលជាទីក្រុងមានពលរដ្ឋរស់នៅចំនួន ១១ លាននាក់ បានចាប់ផ្តើមចាកចេញពីរដ្ឋធានីកាលពីចុងសប្តាហ៍កន្លងទៅ ៕