ប្រធានាធិបតីសហរដ្ឋអាមេរិកលោក Joe Biden នឹងទទួលស្វាគមន៍មេដឹកនាំមកពីជប៉ុន និងហ្វីលីពីន នៅក្នុងសប្តាហ៍នេះ ដើម្បីពង្រឹងទំនាក់ទំនងសេដ្ឋកិច្ច និងការពារជាតិ ស្របពេលដែលប្រទេសសម្ព័ន្ធមិត្តទាំង ២ ព្យាយាមទប់ទល់នឹងអនុភាពកើនឡើងរបស់ចិន និងគ្រប់គ្រងហានិភ័យជាច្រើន ចាប់ពីបញ្ហាកូរ៉េខាងជើង រហូតដល់បញ្ហាសង្រ្គាមនៅអ៊ុយក្រែន និងតំបន់ហ្កាហ្សាស្រ្ទីប ។

ជំនួបកំពូលទ្វេភាគីរបស់លោក Biden ជាមួយនាយករដ្ឋមន្រ្តីជប៉ុនលោក Fumio Kishida នៅថ្ងៃពុធស្អែកនេះ នឹងបង្កើនទំនាក់ទំនងការពារជាតិជាមួយជប៉ុន ដែលជាសម្ព័ន្ធមិត្តសសរស្តម្ភរបស់ទីក្រុងវ៉ាស៊ីងតោន នៅតំបន់ឥណ្ឌូ-ប៉ាស៊ីហ្វិក និងជាដៃគូសកលដ៏សំខាន់មួយ ។

លោក Kishida ធ្វើដំណើរទៅដល់ទីក្រុងវ៉ាស៊ីងតោននាថ្ងៃអង្គារនេះ ជាមួយនឹងភរិយារបស់លោក ហើយលោកនឹងត្រូវស្វាគមន៍យ៉ាងកក់ក្តៅនៅសេតវិមាន ជាកន្លែងដែលលោកចូលរួមពិធីលៀងសាយភោជន៍ពេលល្ងាចជាមួយភ្ញៀវ ២០០នាក់ផ្សេងទៀត ។

ដោយឡែក នៅថ្ងៃព្រហស្បតិ៍ លោកនឹងក្លាយជាមេដឹកនាំជប៉ុនលើកទី ២ ថ្លែងសុន្ទរកថានៅក្នុងជំនួបរួមរបស់សភាអាមេរិក បន្ទាប់ពីអ្នកឡើងកាន់តំណែងមុនរបស់លោក គឺលោក Shinzo Abe បានថ្លែងសុន្ទរកថាកាលពីឆ្នាំ ២០១៥ ។

ក្រុមអ្នកវិភាគនយោបាយ និយាយថា ដំណើរទស្សនកិច្ចលើកនេះ គឺជាឱកាសមួយឲ្យលោក Kishida បង្កើនប្រជាប្រិយភាពរបស់លោក មុនការប្រកួតប្រជែងដំណែងថ្នាក់ដឹកនាំនាខែកញ្ញា នៅក្នុងគណបក្សកាន់អំណាចប្រជាធិបតេយ្យសេរីរបស់លោក ៕