អភិបាលក្រុង Bogota លោក Carlos Galan និយាយថា រដ្ឋធានីរបស់កូឡុំប៊ីមួយនេះ នឹងចាប់ផ្តើមកំហិតការប្រើប្រាស់ទឹកនៅសប្តាហ៍នេះ ដើម្បីកាត់បន្ថយគ្រោះរាំងស្ងួតបង្កឡើងដោយសារបាតុភូតអាកាសធាតុអែល នីញ៉ូ ដែលធ្វើឲ្យរដូវប្រាំងនៅក្នុងប្រទេសមួយនេះ កាន់តែធ្ងន់ធ្ងរខ្លាំង ហើយនិងបណ្តាលឲ្យកម្រិតទឹកក្នុងអាងស្តុកទឹកធ្លាក់ចុះខ្លាំង ។ 

ការរឹតត្បិតនេះ ធ្វើឡើងផងដែរនៅតាមបណ្តាទីក្រុងចំនួន ១១ នៅជាប់រដ្ឋធានី Bogota ហើយនិងធ្វើឲ្យប៉ះពាល់ដល់ពលរដ្ឋប្រហែល ៩លាននាក់ ។

គួរឲ្យដឹងថា បាតុភូតអែល នីញ៉ូ បានកើតឡើងនៅប្រទេសកូឡុំប៊ី កាលពីចុងឆ្នាំ ២០២៣ បណ្តាលឲ្យសីតុណ្ហភាពហក់ឡើងខ្ពស់ និងកើតគ្រោះរាំងស្ងួតដែលនាំឲ្យកើតមានភ្លើងឆេះព្រៃទូទាំងប្រទេស ក៏ដូចជាជំរុញឲ្យអាងស្តុកទឹកធ្លាក់ដល់កម្រិតទាបបំផុតក្នុងរយៈពេលជាច្រើនទសវត្សរ៍កន្លងមកនេះ ។ 

លោក Galan និយាយថា អាងស្តុកទឹក ៣កន្លែង ដែលបង្កើតជាប្រព័ន្ធទឹក Chingaza និងផ្គត់ផ្គង់តម្រូវការទឹកប្រើប្រាស់ប្រហែល ៧០ភាគនៅទីក្រុង Bogota នោះ បច្ចុប្បន្ននៅសល់ត្រឹម ១៦,៩ភាគរយប៉ុណ្ណោះ ពោលគឺជាកម្រិតទាបបំផុតនៅក្នុងរយៈពេល ៤០ឆ្នាំកន្លងមកនេះ ៕