ប្រទេសចំនួន៦នៅអឺរ៉ុបខាងជើងជាប់ព្រំដែនសមុទ្រខាងជើង បាននិយាយកាលពីថ្ងៃអង្គារថា ពួកគេបានចុះហត្ថលេខាលើកិច្ចព្រមព្រៀងមួយ ដើម្បីធ្វើការរួមគ្នាការពារហេដ្ឋារចនាសម្ព័ន្ធ ក្រោមទឹក នៅភាគខាងជើងនៃមហាសមុទ្រអាត្លង់ទិកពីការកើនឡើងហានិភ័យនៃការបំផ្លិចបំផ្លាញ។

ក្រសួងអាកាសធាតុ ថាមពល និងសេវាសាធារណៈរបស់ប្រទេសដាណឺម៉ាក បានហៅសមុទ្រខាងជើងថាជាមជ្ឈមណ្ឌលសម្រាប់ហេដ្ឋារចនាសម្ព័ន្ធដ៏សំខាន់ដែលតភ្ជាប់អឺរ៉ុបតាមរយៈខ្សែអគ្គិសនី បំពង់ឧស្ម័ន និងការតភ្ជាប់ទូរគមនាគមន៍ ហើយជាប្រភពថាមពលកកើតឡើងវិញដ៏សំខាន់។

ក្រសួងរបស់ប្រទេសដាណឺម៉ាកនេះ បាននិយាយថា៖«ការបង្កើនការពឹងផ្អែកគ្នាទៅវិញទៅមក នៅទូទាំងព្រំដែន បានកើតឡើង ហើយដោយសារតែបែបនេះ ទើបមានការបង្កើនឡើងនូវហានិភ័យនៃការបំផ្លិចបំផ្លាញ និងធ្វើឲ្យអ្នកបង្កអរិភាពមានការចាប់អារម្មណ៍កាន់តែខ្លាំងឡើង»។

ការសម្រេចនេះ កើតឡើង បន្ទាប់ពីការផ្ទុះនៅឆ្នាំ ២០២២ មិនទាន់អាចដោះស្រាយបាន ដែលបានបំផ្លាញបំពង់បង្ហូរឧស្ម័ន Nord Stream នៅសមុទ្របាល់ទិក។ ពួកគេ បានកើតឡើងនៅក្នុងដែនទឹកអន្តរជាតិ ប៉ុន្តែនៅក្នុងតំបន់សេដ្ឋកិច្ចស៊ុយអែត និងដាណឺម៉ាក។ ប្រទេសទាំងពីរ បានបិទការស៊ើបអង្កេតរបស់ពួកគេចំពោះការបំផ្ទុះនេះ។

ការផ្ទុះនេះ បានធ្វើឲ្យខូចបំពង់បង្ហូរ Nord Stream 1 ដែលជាផ្លូវផ្គត់ផ្គង់ឧស្ម័នធម្មជាតិដ៏សំខាន់របស់រុស្ស៊ីទៅកាន់ប្រទេសអាល្លឺម៉ង់ រហូតដល់ប្រទេសរុស្ស៊ី បានកាត់ផ្តាច់ការផ្គត់ផ្គង់ នៅចុងខែសីហា ឆ្នាំ ២០២២។ ពួកគេ ក៏បានធ្វើឲ្យខូចខាតដល់បំពង់បង្ហូរ Nord Stream 2 ដែលមិនទាន់បានបម្រើសេវាផង ដោយសារប្រទេសអាល្លឺម៉ង់ បានផ្អាកដំណើរការបញ្ជាក់របស់ខ្លួន រយៈពេលមិនយូរប៉ុន្មាន មុនពេលរុស្ស៊ីចូលឈ្លានពានអ៊ុយក្រែន ក្នុងខែកុម្ភៈ ឆ្នាំនោះ។