ភ្នាក់ងារគយទីក្រុងហុងកុង បានប្រកាសឲ្យដឹងកាលពីថ្ងៃចន្ទថា ពួកគេបានរកឃើញករណីរត់ពន្ធមាសខុសច្បាប់ទ្រង់ទ្រាយធំបំផុតនៅក្នុងកំណត់ត្រាទីក្រុង ដោយពួកគេរឹបអូសបានមាសទម្ងន់ប្រហែល ១៤៦គ.ក នៅអាកាសយានដ្ឋានអន្តរជាតិក្រុងហុងកុង កាលពីខែមុន ។ 

លោក Jason Lau គឺជាប្រធានគយស្តីទី និយាយនៅក្នុងសន្និសីទសារព័ត៌មានថា មាសរត់ពន្ធខុសច្បាប់ទាំងនេះ ត្រូវបានចាប់ជាប់នៅក្នុងម៉ាស៊ីនបូមខ្យល់ ២គ្រឿង ដែលបញ្ជូនតាមផ្លូវអាកាសចេញពីទីក្រុងហុងកុង ទៅកាន់ប្រទេសជប៉ុន ដែលមានតម្លៃប្រហែល ១០,៧លានដុល្លារ ។ 

លោក Lau បន្តថា គោលបំណងសង្ស័យនៃប្រតិបត្តិការរត់ពន្ធមាសខុសច្បាប់នេះ គឺចង់គេចពន្ធនាំចូលប្រហែល ១០ភាគរយនៅប្រទេសជប៉ុន ដើម្បីសន្សំប្រាក់បានជាង ១លានដុល្លារ បើសិនជាជោគជ័យ ។ 

បុរសវ័យ ៣១ឆ្នាំម្នាក់ ត្រូវបានចាប់ខ្លួន ហើយត្រូវបានដោះលែងវិញ ដោយដាក់ប្រាក់តម្កល់ ។  

ក្រោមច្បាប់ទីក្រុងហុងកុង ការរត់ពន្ធខុសច្បាប់បែបនេះ នឹងត្រូវកាត់ទោសឲ្យជាប់ពន្ធនាគាររយៈពេលអតិបរមាចំនួន ៧ឆ្នាំ និងពិន័យជាប្រាក់ជាង ២៥៥.០០០ដុល្លារ ៕