នៅថ្ងៃអង្គារនេះ រដ្ឋមន្រ្តីកសិកម្មអាល្លឺម៉ង់ស្វាគមន៍កិច្ចព្រមព្រៀងលើការទប់ស្កាត់ការនាំចូលស្បៀងពីអ៊ុយក្រែន ដែលប្រទេសសមាជិកមួយចំនួន និយាយថា វានឹងបានធ្វើឲ្យអស្ថិរភាពដល់ទីផ្សារកសិកម្មនៅក្នុងប្លុកមួយនេះ ។ 

 ក្រុមតំណាងរាស្រ្តសហភាពអឺរ៉ុប និងប្រទេសបែលហ្ស៊ិក ដែលកាន់តំណែងជាប្រធានសហភាពអឺរ៉ុបវិលជុំរយៈពេល ៦ខែ និយាយកាលពីថ្ងៃចន្ទថា ពួកគេបានឈានដល់កិច្ចព្រមព្រៀងមួយលើការទប់ស្កាត់ការនាំចូលនេះ ។ វានៅត្រូវការការអនុម័តពីសមាជិកសហភាពអឺរ៉ុបផ្សេងទៀត និងសភាអឺរ៉ុបប៉ុណ្ណោះ ។ 

 ក្រុមអ្នកសម្រេចចិត្តសហភាពអឺរ៉ុប បានប៉ះទង្គិចគ្នាអស់រយៈពេលជាច្រើនសប្តាហ៍មកហើយលើការកំណត់ការនាំចូលដោយលើកលែងពន្ធសម្រាប់ផលិតផលកសិកម្មអ៊ុយក្រែន ។ 

 លោក Janusz Wojciechowski គឺជាស្នងការកសិកម្មសហភាពអឺរ៉ុប បាននិយាយផងដែរថា គណកម្មការប្រតិបត្តិប្លុកមួយនេះ បានជួបជាមួយក្រុមតំណាងកសិករ លើសំណើកាត់បន្ថយបន្ទុករដ្ឋបាលលើកសិករ ក្រោមគោលនយោបាយកសិកម្មរួមរបស់សហភាពអឺរ៉ុប ៕