ខេត្តពោធិ៍សាត់ ៖ យុវជនប្រមាណ៥០០នាក់ មកពីបណ្តាឃុំទាំង៩ក្នុងស្រុកបាកាន នឹងចូលរួមរាំងចង្វាក់ប្រពៃណីខ្មែរ និងប្រកួតរាំម៉ាឌីហ្សុនទូលក្អម នៅក្នុងកម្មវិធីសង្ក្រាន្តបាកានឆ្នាំ២០២៤ ដែលនឹងរៀបចំធ្វើឡើងនៅវត្តបាកាន ស្ថិតក្នុងឃុំត្រពាំងជង ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ។
បើតាមប្រធានក្រុមដែលកំពុងដឹកនាំយុវជនឃុំត្រពាំងជង ហាត់សមរាំ បានឲ្យដឹងថា ក្រុមយុវជនឃុំត្រពាំងជង បានត្រៀមខ្លួនរួចជាស្រេចហើយ ដើម្បីរាំចង្វាក់ខ្មែរ និងចូលរួមប្រកួតរាំងម៉ាឌីហ្សុនទូលក្អម ក្នុងកម្មវិធីសង្ក្រាន្តបាកានឆ្នាំ២០២៤ នៅវត្តបាកាន ។
យុវជនក្នុងឃុំត្រពាំងជង និងឃុំស្នាមព្រះបានបង្ហាញអារម្មណ៍រីករាយដែលនឹងត្រូវចូលរួមប្រកួតរាំម៉ាឌីហ្សុនទូលក្អមជាមួយយុវជនមកពីឃុំផ្សេងៗក្នុងស្រុកបាកាន ហើយប្តេជ្ញានឹងយកជ័យជម្នះឲ្យបាន។
បើតាមឯកឧត្តមបណ្ឌិត ទី ថានី អនុប្រធានក្រុមការងារចុះជួយស្រុកបាកាន និងជាប្រធានគណៈកម្មការរៀបចំសង្ក្រាន្តបាកានឆ្នាំ២០២៤ បានឲ្យដឹងថា ដើម្បីផ្តល់ភាពសប្បាយរីករាយជូនដល់បងប្អូនប្រជាពលរដ្ឋក្នុងស្រុកបាកាន ក៏ដូចជាក្នុងខេត្តពោធិ៍សាត់ ក្រុមការងារចុះជួយស្រុកបាកាន បានសហការជាមួយអាជ្ញាធរមូលដ្ឋាន ព្រះសង្ឃនិងគណៈកម្មការវត្តបាកាន ដើម្បីរៀបចំសង្ក្រាន្តបាកានឆ្នាំ២០២៤នេះឡើង រយៈពេល៤ថ្ងៃ ដោយមានកម្មវិធីយ៉ាងច្រើន រួមមាន ការប្រគំតន្ត្រីដោយតារាចម្រៀងល្បីៗមកភ្នំពេញ តារាកំប្លែងល្បីៗ , កម្មវិធីរាំចង្វាក់ប្រពៃណីខ្មែរនិងប្រកួត
រាំម៉ាឌីហ្សុនទូលក្អមដោយយុវជន៥០០នាក់ , កម្មវិធីប្រដាល់បែបស្រុកស្រែ ,ការសម្តែងរបាំងខ្មែរ ,តាំងពិព័រណ៍ស្នាដៃ និងផលិតផលឃុំទាំង៩, ការលេងល្បែងប្រជាប្រិយខ្មែរជាច្រើនមុខ, កម្មវិធីប្រកួតបាល់ទះ , ហើយក៏មានក្រុមDJ និងការរាំកំសាន្ត ដោយមានបាញ់ទឹក និងបាញ់ពពុះសាប៊ូរផងដែរ។ ឯកឧត្តម បានបញ្ជាក់បន្ថែមថា ចំពោះកម្មវិធីរាំចង្វាក់ប្រពៃណីខ្មែរដោយក្រុមយុវជនចំនួន៥០០នាក់គឺចង់ឲ្យយុវជនចូលរួមថែរក្សានូវអ្វីជារបស់ខ្មែរ ដូនតាយើងបានបន្សល់ទុកឲ្យ ចំណែកការប្រកួតរាំម៉ាឌីហ្សុនទូលក្អមដោយយុវជន៥០០នាក់គឺមានអត្ថន័យចង់ឲ្យយុវជនចេះមានចិត្តអំណត់អត់ធ្មត់ និងជាពិសេសគឺចេះរួមសាមគ្គីភាពគ្នាទើបទទួលបានជ័យជម្នះ ដូចពាក្យ “សាមគ្គី១០ ជ័យជម្នះ១០” ៕ អត្ថបទ ៖ ភិរុណ ពៅ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
