​បាល់ទាត់៖ ​ខ្សែបម្រើ​ក្រុម​កាំភ្លើង​ធំ Arsenal, Emile Smith Rowe បាន​បន្ត​ការប្តេជ្ញាចិត្ត​របស់ខ្លួន​នៅ​ជាមួយ​ក្លិប​​ដែល​មាន​មូលដ្ឋាន​នៅ​ទីក្រុង​ឡុង​ដ៍ បន្ទាប់ពី​ចុះកិច្ចសន្យា​រយៈពេល​វែង​។ កីឡាករ​វ័យ ២០​ឆ្នាំ​ដែល​ចេញពី​ថ្នាល​យុវជន​របស់ Arsenal ស្រាប់​រូប​នេះ​ធ្លាប់​បាន​ទទួល​សំណើ​ទិញ​ពី Aston Villa ពីរ​លើក​តែ​សុទ្ធតែ​ត្រូវ​បាន​បដិសេធ​។​

​​Emile Smith Rowe បង្ហាញខ្លួន​រដូវ​កាល​មុន​ឱ្យ Arsenal នៅ Premier League បាន ២០​លើក​រកបាន ២គ្រាប់​ និង​គ្រាប់​បាល់​បញ្ជូន ៤ ដែល​ចាត់ទុកជា​រដូវ​កាល​ដ៏​ល្អ​មួយ​ សំរាប់​កីឡាករ​ដែល​ចេញពី​ថ្នាល​យុវជន​រូបនេះ​។​ ​រដូវ​កាល​ថ្មី​នេះ Smith Rowe បានទទួល​អាវ​លេខ ១០ នៅ Arsenal ដែល​ធ្លាប់​ពាក់​ដោយ Denis Bergkamp និង Mesut Ozil​។​ ​កីឡាករ​ក្រុមយុវជន​អាយុ​ក្រោម ២១ឆ្នាំ​អង់គ្លេស​រូបនេះ​នៅសល់​កិច្ចសន្យា ២ឆ្នាំ​ទៀត​ជាមួយ Arsenal និង​ធ្លាប់​ត្រូវបាន Aston Villa ដាក់សំណើ​សុំ​ទិញ​តំលៃ ២៥លាន​ផោន​លើក​ទី១ និង ៣០លាន​ផោន​នៅ​លើក​ទី២ តែ Arsenal ក្រោម​ការដឹកនាំ​របស់ Mikel Arteta មិន​មាន​គម្រោង​លក់​ចេញ​នោះ​ឡើយ និង​ចាត់​ទុក​រូបគេ​ជា​កីឡាករ​សំខាន់​នា​ពេល​អនាគត​៕

​អត្ថបទ​៖​នាង សុភា​វុ​ធ