អាជ្ញាធរមូលដ្ឋាន តាមសង្កាត់នីមួយៗ បន្តនាំយកបណ្ណក្រីក្រ និង​បណ្ណ​សម្គាល់​គ្រួសារ​ងាយ​រង​ហានិភ័យ​ជូន​ប្រជាពលរដ្ឋរស់នៅក្នុងមូលដ្ឋានរបស់ខ្លួន។ គ្រួសារដែលមានបណ្ណក្រីក្រ និងគ្រួសារ​ដែល​មាន​បណ្ណ​សម្គាល់គ្រួសារងាយរងហានិភ័យ ជាក្រុមអាទិភាព ដែលរាជរដ្ឋាភិបាល​មាន​ការ​យក​ចិត្ត​ទុកដាក់ជាខ្លាំង បានបង្កើតកម្មវិធី​ជំនួយ​សង្គម​នានា​កន្លង​មក​នេះ​ក៏​ដូច​ជា​ការ​ផ្ដល់​សេវា​ព្យាបាល​នៅ​តាមមន្ទីរពេទ្យរដ្ឋដោយមិនគិតថ្លៃសម្រាប់ពួកគេ។

អាជ្ញាធរតាមមូលដ្ឋាន បានបន្តនាំយកបណ្ណក្រីក្រ និងបណ្ណសម្គាល់គ្រួសារងាយរងហានិភ័យ ដែល​ចេញ​ដោយក្រសួងផែនការ ដើម្បីផ្ដល់​ជូន​បន្ត​ដល់​ពលរដ្ឋ​ដែល​រស់​នៅ​ក្នុង​មូលដ្ឋាន​របស់​ខ្លួន​។ ជាក់ស្ដែងសម្រាប់ សង្កាត់បឹងទំពន់ទី ២ បានយកបណ្ណទាំងពីរប្រភេទនេះ ទៅចែក​ជូន​ដល់​ប្រជា​ពលរ​ដ្ឋដល់ខ្នងផ្ទះ ដើម្បីឱ្យពួក​គេ​អាច​ទទួល​បាន​នូវ​អត្ថ​ប្រយោជន៍​ដែល​រាជ​រដ្ឋាភិបាល​ផ្ដល់​ជូន​។

លោក អ៊ុម ហ៊ុយឈុនហេង ជាចៅសង្កាត់បឹងទំពន់ទី ២ លើកឡើងថា គ្រួសារដែល​ទទួល​បណ្ណ​ទាំងពីរ​ប្រភេទ​នេះ មានទាំងគ្រួសារចាស់ដែលធ្វើបច្ចុប្បន្នភាព ក្រោយ​បណ្ណ​ចាស់​ហួស​សុពល​ភាព ​និងមានទាំងគ្រួសារថ្មីដែលដាក់ពាក្យស្នើសុំការសម្ភាសន៍ថ្មី។ លោកថា គ្រួសារ​ខ្លះ​ទទួល​បាន​បណ្ណ​ក្រីក្រ ​រីឯគ្រួសារខ្លះទៀត ទទួលបាន​បណ្ណ​សម្គាល់​គ្រួសារ​ងាយ​រង​ហានិភ័យ​ជា​គ្រួសារ​ដែល​មាន​ជីវភាព​ក្បែរក្រ។

សម្រាប់​គ្រួសារដែលទទួលបានបណ្ណ ក្រីក្រ ឬបណ្ណសម្គាល់គ្រួសារងាយរងហានិភ័យនៅថ្ងៃនេះ ពួក​គេ​បាន​ដឹងពីអត្ថប្រយោជន៍ដែលរាជរដ្ឋាភិបាលផ្ដល់ជូនពួកគេ។ ពួកគេថា បណ្ណក្រីក្រ ឬ​បណ្ណ​សម្គាល់​គ្រួសារ​ងាយរងហានិភ័យ គឺមានគុណតម្លៃជាខ្លាំងសម្រាប់សមាជិកគ្រួសារទាំងមូល។ ពួក​គេ​ពិត​ជា​ដឹងគុណដល់រាជរដ្ឋាភិបាលកម្ពុជា ដែលតែងយកចិត្តទុកដាក់ ជួយគាំទ្រ​ដល់​ការ​រស់​នៅ​របស់​ប្រជាពលរដ្ឋ​ដែលមានជីវភាពខ្វះខាត។

បច្ចុប្បន្នសម្រាប់គ្រួសារមានបណ្ណក្រីក្រ អាចទទួលបានអត្ថប្រយោជន៍ធំៗ ចំនួន ៣។ អត្ថ​ប្រយោជន៍​ទី១ គឺការទទួលបានប្រាក់ឧបត្ថម្ភពីកម្មវិធីជំនួយសង្គម។ អត្ថប្រយោជន៍ទី ២ គឺ​រដ្ឋាភិបាល​ធានា​រ៉ាប់រងលើការចំណាយសម្រាប់ការព្យាបាលនៅគ្រប់មន្ទីរពេទ្យរដ្ឋ និងអត្ថ​ប្រយោជន៍​ទី៣ គឺសំដៅកម្មវិធីបណ្ដុះបណ្ដាលជំនាញបច្ចេកទេស យុវជនក្រីក្រ ១,៥លាននាក់។ យុវជ​ន​អាចទទួលបានការសិក្សាដោយមិនគិតថ្លៃ និងទទួលបានបប្រាក់ឧបត្ថម្ភផងដែរ។

សម្រាប់​គ្រួសារ​ដែលមានបណ្ណសម្គាល់គ្រួសារងាយរងហានិភ័យ សំដៅលើគ្រួសារក្បែរក្រ គឺពួក​គេ​ក៏​អាច​ប្រើ​ប្រាស់​បណ្ណ ដើម្បីទទួលសេវាព្យាបាលដោយមិនគិតថ្លៃ នៅគ្រប់មន្ទីរ​ពេទ្យ​រដ្ឋ​ផង​ដែរ​។ ​លើសពីនេះ យុវជនដែលរស់នៅក្នុងគ្រួសារដែលមានបណ្ណសម្គាល់គ្រួសារងាយរងហានិភ័យ ក៏​អាច​ទៅ​ចុះ​ឈ្មោះចូលរៀនជំនាញវិជ្ជាជីវៈ និងទទួលបានអត្ថបប្រយោជន៍ ពីកម្ម​វិធី​បណ្ដុះ​បណ្ដាល​ជំនាញ​បច្ចេកទេស ដល់យុវជនមកពីគ្រួសារក្រីក្រ និងគ្រួសារ​ងាយ​រង​ហានិភ័យ​ផង​ដែរ​៕​ អត្ថបទ៖ គឹមហុក