ខណៈនៅថ្ងៃទី១៣ ខែមេសាខាងមុខនេះ ពិធីបុណ្យចូលឆ្នាំថ្មីប្រពៃណីខ្មែរនឹងចូលមកដល់ ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានអំពាវនាវដល់ពលរដ្ឋ អ្នកទេសចរ​ទៅ​តាម​តំបន់​រម្មណីយដ្ឋានផ្សេងៗ ចូលរួមកាត់បន្ថយការប្រើប្រាស់ថង់ប្លាស្ទិក និងចូលរួមទុកដាក់សំរាម សំណល់​ដែល​បានប្រើប្រាស់រួចឱ្យបានត្រឹមត្រូវនៅតាមទីតាំងទុកដាក់សំរាម។

តាមរយៈកិច្ចសម្ភាសន៍ជាមួយទូរទស្សន៍ BTV ឯកឧត្តម ខ្វៃ អាទិត្យា បានលើកឡើងាថា ជា​ការ​ពិសេស​ដោយ​សារពិធីបុណ្យចូលឆ្នាំប្រពៃណីជាតិខ្មែរ ឆ្នាំនេះ គឺបានប្រព្រឹត្តទៅរយៈពេល ៤ ថ្ងៃ ចាប់​ពីថ្ងៃទី១៣ រហូតដល់ថ្ងៃទី១៦ ខែមេសា ឆ្នាំ ២០២៤នេះ។ ឯកឧត្តមបានលើកឡើងថា ក្នុង​ឆ្នាំ​ថ្មីនេះ ប្រជាពលរដ្ឋមានភាពសប្បាយរីករាយខ្លាំង ដោយ​ប្រជាពលរដ្ឋ​ខ្មែរ​បាន​រស់​នៅ​ក្រោម​ម្លប់​សន្ដិភាព អាចមានឱកាសប្រារព្ធពិធីបុណ្យចូលឆ្នាំថ្មីនៅគ្រប់មូលដ្ឋានភូមិ ឃុំ ស្រុក ក្រុង​នៅទូ​ទាំងប្រទេស។

ឯកឧត្តមបានលើកឡើងថា ដូច្នេះក្នុងនាមជាប្រជាពលរដ្ឋខ្មែរ ដែលស្រឡាញ់ប្រទេសជាតិ ក្រៅ​ពី​សប្បាយ​រីករាយក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ជួបជុំក្រុមគ្រួសារ បងប្អូន ក៏ត្រូវ​រួម​គ្នា​ថែ​រក្សាអនាម័យ បរិស្ថាន ទុកដាក់សំរាមឱ្យបានត្រឹមត្រូវ ដើម្បីធ្វើឱ្យមូលដ្ឋាន វត្តអារាម និង​តំបន់​រម្មណីយដ្ឋាននានា មានភាពស្អាត សោភ័ណភាពល្អ ទាក់ទាញទេសចរជាតិ អន្តរជាតិ​មក​លេង​កម្សាន្ត​សប្បាយហើយស្ងើចសរសើរអំពីភាពស្អាតរបស់ប្រទេសកម្ពុជា។

សូមជម្រាបថា ក្រសួងបរិស្ថានតាមរយៈការដាក់ចេញនូវយុទ្ធនាការ «ថ្ងៃនេះ​ខ្ញុំ​មិន​ប្រើ​ថង់​ប្លាស្ទិក​ទេ»​ មានសាធារណៈជន សិស្សានុសិស្ស កម្មករកម្មការិនីសរុបជិត ៨ លាន​នាក់​បាន​ចូលរួម​ក្នុង​យុទ្ធនាការ​នេះ។ តាមរយៈយុទ្ធនាការនេះ ពលរដ្បានប្ដេជ្ញាថា យ៉ាងហោចណាស់១ថ្ងៃ ពួក​គេ​មិន​ប្រើ​ប្រាស់​ថង់ប្លាស្ទិកឡើយ៕ អត្ថបទ៖ វ៉ន ដារ៉ា