ភ្នំពេញ ៖ ដើម្បីអបអរបុណ្យចូលឆ្នាំថ្មីប្រពៃណីជាតិ ឆ្នាំ២០២៤ នៅព្រឹកថ្ងៃទី១០ ខែមេសា ឆ្នាំ២០២៤នេះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យមន្ត្រីចុះសួរសុខទុក្ខ និងឧបត្ថម្ភថវិកា គ្រឿងឧបភោគ-បរិភោគ សម្ភារប្រើប្រាស់ ជាលើកទី១០ និងរៀបចំអាហារថ្ងៃត្រង់មួយពេល ជូនដល់កុមារខ្សោយសតិបញ្ញា កុមារពិការ កុមារផ្ទុកមេរោគអេដស៍ កុមារកំព្រា គ្រូ-បុគ្គលិក និងអ្នកស្ម័គ្រចិត្តបរទេសសរុបចំនួន ២៦០នាក់ នៅក្នុងបុរីទារក និងកុមារជាតិ ដែលមានទីតាំងស្ថិតនៅ ភូមិតំណាក់៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

ក្នុងឱកាសសំណេះសំណាលនោះលោក ជំទាវ ម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើការសួរសុខទុក្ខ អាណិត ស្រឡាញ់ប្រកបដោយមនោសញ្ចេតនាយ៉ាងជ្រាលជ្រៅ ចំពោះកុមារទាំងអស់ និងថ្លែងនូវការកោតសរសើរចំពោះទឹកចិត្តដ៏ថ្លៃថ្លារបស់ គ្រូ-បុគ្គលិក អ្នកស្ម័គ្រចិត្ត ដែលបានយកអស់កម្លាំងកាយ-ចិត្ត រួមចំណែកលើកកម្ពស់តម្លៃមនុស្សធម៌របស់មនុស្សជាតិ ពិសេសជួយឱ្យកុមារពិការខ្សោយសតិបញ្ញាទាំងអស់ បានរស់នៅប្រកបដោយសេចក្តីថ្លៃថ្នូរ មានការចិញ្ចឹមបីបាច់ ផ្តល់ភាពកក់ក្តៅ ផ្តល់ការអប់រំ ការបណ្តុះបណ្តាលសិល្បៈ។ល។

ជាមួយគ្នានោះ លោកស្រី ថោ ពៅ ប្រធានបុរីទារក និងកុមារជាតិ បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខ ផ្តល់ភាពកក់ក្តៅ ភាពស្និទ្ធស្នាល ក្តីអាណិតស្រឡាញ់ លើកទឹកចិត្ត ហើយបានឧបត្ថម្ភជាបន្តបន្ទាប់ ចាប់តាំងពីឆ្នាំ ២០១៦ មក និងសូមជូនពរដល់ សម្តេចកិត្តិព្រឹទ្ធបណ្ឌិត មានសុខភាពល្អ កម្លាំងមាំមួន អាយុយ៉ឺនយូរ ដើម្បីនៅជាម្លប់ និងផ្តល់ក្តីសង្ឃឹមដល់ជនរងគ្រោះ និងងាយរងគ្រោះបំផុត។

សូមបញ្ជាក់ថា អំណោយប្រគល់ជូនបុរីទារក និងកុមារជាតិរួមមាន៖ អង្ករ៣តោន មី២០កេស ត្រីខ៥កេស ទឹកត្រី១០យួរ ទឹកក្រូច៣០កេស ទឹកសុទ្ធ៤០កេស ផ្លែក្រូច៥កេស អាល់កុល៣០ពីដុង ថវិកា១០លានរៀល និងរៀបចំអាហារថ្ងៃត្រង់មួយពេល៕

អត្ថបទៈ សំ ងីម​