ក្រុមវេជ្ជបណ្ឌិតក្នុងប្រទេសបូលីវី បានចេញធ្វើកូដកម្មទូទាំងប្រទេសកាលពីថ្ងៃអង្គារសប្ដាហ៍នេះ ដើម្បីតវ៉ាប្រឆាំងនឹងពង្រាងច្បាប់ស្ដីពីការចូលនិវត្តន៍ ដែលពួកគេអះអាងថា នឹងបង្ខំពួកគេឲ្យចូលនិវត្តន៍នៅពេលពួកគេឈានចូលដល់អាយុ៦៥ឆ្នាំ ។

ក្រុមវេជ្ជបណ្ឌិត បានចាប់ផ្ដើមក្បួនកូដកម្មទូទាំងប្រទេសរយៈពេល៧២ម៉ោង ដែលមានការចូលរួមដោយ គ្រូបង្រៀន ផងដែរ ប្រឆាំងទៅនឹងអ្វីដែលពួកគេហៅថាជាការបង្ខំឲ្យមន្ត្រីរដ្ឋចូលនិវត្តន៍ ដែលរដ្ឋាភិបាលមានបំណងបញ្ជូនទៅកាន់សភាឲ្យអនុម័ត ។

អនុរដ្ឋមន្ត្រីសេវាហិរញ្ញវត្ថុ និងប្រាក់សោធននិវត្តន៍ លោក ហ្វ្រានស៍អាប៉ាហ្សា (Franz Apaza) បានច្រានចោលពង្រាងច្បាប់ដែលនឹងបង្ខំឲ្យពួកគេចូលនិវត្តន៍នៅអាយុ ៦៥ឆ្នាំ ប៉ុន្តែក្រុមសាស្ត្រាចារ្យពេទ្យ នឹងត្រូវធ្វើតេស្តសុខភាព ថាតើពួកគេអាច ស័ក្តិសមនឹងតួនាទីនោះដែរឬអត់។

នៅក្នុងប្រទេសបូលីវី អាយុចូលនិវត្តន៍ដោយស្ម័គ្រ ត្រូវបានកំណត់ត្រឹម៥៨ ឆ្នាំ សម្រាប់បុរស និងស្ត្រី៥៥ឆ្នាំ ទោះជាប្រធានវេជ្ជសាស្ត្រឡាប៉ាស់(La Paz Medical College) លោក អេដហ្គា វីឡេហ្កាស (Edgar Villegas) និយាយថាក្រុមវេជ្ជបណ្ឌិត ត្រូធ្វើការយូរទៀត ដើម្បីទទួលបានប្រាក់សោធននិវត្តន៍ក៏ដោយ៕