ភ្នំពេញ ៖ ក្នុងឱកាសអបអរសាទរបុណ្យចូលឆ្នាំខ្មែរប្រពៃណីជាតិ ឆ្នាំ២០២៤ ដែលនឹងឈានមកដល់នាពេលខាងមុខនេះ ក្រុមហ៊ុន ជាវ័យ (ខេមបូឌា) ហ្គាមេន ហ្វេកធើរី ដែលជារោងចក្រកាត់សម្លៀកបំពាក់ ស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានរៀបចំកម្មវិធីជួបជុំអាហារសាមគ្គី ដើម្បីបង្ករបរិយាកាសរីករាយ និងអរគុណដល់កម្មករនិយោជិតដែលខិតខំបំពេញការងារនាពេលកន្លងមក។

​លោក រ៉េមិន តាន់ នាយកក្រុមហ៊ុន ជាវៃ ក្នុងបទសម្ភាសន៍ជាមួយព័ត៌មាន ប៊ីធីវី នៅរសៀលថ្ងៃទី១០ ខែមេសានេះ បានមានប្រសាសន៍ថា ការរៀបចំកម្មវិធី ដែលមានការជួបជុំអាហារ ការចាប់រង្វាន់ និងរាំលេងកម្សាន្តនេះ ក្នុងគោលបំណងបង្កើនភាពសប្បាយរីករាយ បង្កើនភាពស្និទ្ធស្នាល សាមគ្គីភាព រវាងថ្នាក់ដឹកនាំ និងកម្មករនិយោជិតទាំងអស់របស់ក្រុមហ៊ុន។ លោកបានឲ្យដឹងថា ក្នុងពិធីបុណ្យចូលឆ្នាំប្រពៃណីជាតិខ្មែរឆ្នាំនេះ រោងចក្រអនុញ្ញាតឲ្យកម្មករនិយោជិតឈប់សម្រាកដោយមានប្រាក់ឈ្នួលរយៈពេល ៧ថ្ងៃ ចាប់ពីថ្ងៃទី១១ រហូតដល់ថ្ងៃទី១៨ ខែមេសា ឆ្នាំ២០២៤ ទើបត្រឡប់ចូលបំពេញការងារធម្មតាឡើងវិញ។

ក្នុងឱកាសអបអរសាទរបុណ្យចូលឆ្នាំថ្មីនេះ កម្មករ កម្មការិនី បានបង្ហាញនូវទឹកមុខសប្បាយរីករាយ និងសង្ឃឹមថា ក្រោមការដឹកនាំរបស់រាជរដ្ឋាភិបាលអាណត្តិទី៧ គឺសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នឹងបន្តអភិវឌ្ឍន៍ប្រទេស ឲ្យកាន់តែរីកចម្រើនទៅមុខបន្ថែមទៀត ជាពិសេសទាក់ទាញអ្នកវិនិយោគថ្មីៗ និងបង្កើតឱកាសការងារកាន់តែច្រើនជូនដល់ប្រជាពលរដ្ឋ ដើម្បីមានប្រាក់ចំណូលទៀងទាត់ដើម្បីផ្គត់ផ្គង់គ្រួសារ។

 ជាមួយគ្នានេះលោក គឹម ចាន់សំណាង ប្រធានសហភាពសិទ្ធិកម្មករកម្ពុជា បានឲ្យដឹង ប៊ីធីវី ដឹងដែរថា ជារៀងរាល់ឆ្នាំក្នុងរដូវបុណ្យចូលឆ្នាំប្រពៃណីជាតិខ្មែរ ភាគីរោងចក្រភាគច្រើន តែងតែរៀបចំកម្មវិធីបែបនេះ និងកម្មវិធីសង្រ្កាន្តជាដើម ដើម្បីចូលរួមអបអរសាទពិធីបុណ្យជាតិរបស់ខ្មែរ។ ជាងនេះទៅទៀតនោះ ដើម្បីឲ្យកម្មករនិយោជិតបានរាំលេងកម្សាន្ត និងជួបជុំគ្នា មុនចាកចេញទៅស្រុកកំណើតរៀងៗខ្លួន។

សូមបញ្ជាក់ថា ជារៀងរាល់ឆ្នាំ ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ប្រជាពលរដ្ឋភាគច្រើនតែងតែចាកចេញពីរាជធានីភ្នំពេញ ទៅជួបជុំក្រុមគ្រួសារនៅស្រុកកំណើត និងខ្លះទៀតធ្វើដំណើរកម្សាន្តទាំងក្នុង និងក្រៅប្រទេស។ សម្រាប់ឆ្នាំ២០២៤នេះ រាជរដ្ឋាភិបាលកម្ពុជា បានប្រកាសអនុញ្ញាតឱ្យកម្មករនិយោជិតទាំងអស់ ឈប់សម្រាកដោយមានប្រាក់ឈ្នួលរយៈពេល ៤ថ្ងៃ គឺថ្ងៃ១៣-១៤-១៥ និង១៦ ខែមេសា ឆ្នាំ២០២៤៕

អត្ថបទ ៖ ឈិត បូរ៉ាវី