ប្រទេសអាល្លឺម៉ង់កាលពីថ្ងៃអង្គារ បានច្រានចោលយ៉ាងដាច់អហង្ការករណីដែលបានប្តឹងដោយប្រទេសនីការ៉ាហ្គ័រ នៅតុលាការកំពូលរបស់អង្គការសហប្រជាជាតិ ដោយចោទប្រកាន់ទីក្រុងប៊ែរឡាំងថាបានសម្របសម្រួលការរំលោភលើអនុសញ្ញាទីក្រុងហ្សឺណែវ និងច្បាប់មនុស្សធម៌អន្តរជាតិ ដោយផ្តល់អាវុធនិងជំនួយផ្សេងទៀត ដល់អ៊ីស្រាអែល ក្នុងការវាយប្រហាប្រល័យពូជសាសន៍លើតំបន់ហ្កាហ្សា។

លោក Christian Tams សមាជិកនៃក្រុមអ្នកច្បាប់របស់ប្រទេសអាល្លឺម៉ង់ បានប្រាប់គណៈកម្មាធិការដែលមានចៅក្រមចំនួន១៦រូប នៅតុលាការយុត្តិធម៌អន្តរជាតិថា៖«នាទីដែលយើងតាមមើលយ៉ាងដិតដល់ ការចោទប្រកាន់របស់នីការ៉ាហ្គ័រ បានបរាជ័យជាផ្នែកៗ។

កាលពីថ្ងៃចន្ទ ប្រទេសនីការ៉ាហ្គ័រ បានជំរុញក្រុមចៅក្រមឲ្យបញ្ជាឲ្យបញ្ឈប់ជំនួយយោធាអាល្លឺម៉ង់ដល់ អ៊ីស្រាអែល ដោយលើកហេតុផលថា ការគាំទ្ររបស់ទីក្រុងប៊ែរឡាំង ធ្វើឲ្យមានអំពើប្រល័យពូជសាសន៍ និងការបំពានច្បាប់មនុស្សធម៌អន្តរជាតិ នៅក្នុងតំបន់ហ្កាហ្សា។

ប្រធានក្រុមផ្នែកច្បាប់របស់ប្រទេសអាល្លឺម៉ង់ លោកស្រី Tania von Uslar-Gleichen បាននិយាយថា ការអះអាងរបស់នីការ៉ាហ្គ័រ គឺ«មិនមានមូលដ្ឋាននៅក្នុងអង្គហេតុ ឬអង្គច្បាប់ទេ។ ពួកគេពឹងផ្អែកលើការវាយតម្លៃនៃការប្រព្រឹត្តដោយអ៊ីស្រាអែល មិនមែនជាភាគីនៃការប្តឹងតវ៉ាទាំងនេះទេ»។

សវនាការបឋមដែលបានធ្វើឡើងនៅថ្ងៃចន្ទ និងថ្ងៃអង្គារ គឺផ្តោតតែលើសំណើរបស់នីការ៉ាហ្គ័រសម្រាប់អ្វីដែលគេហៅថា វិធានការបណ្តោះអាសន្ន រួមទាំងការបញ្ជារបស់តុលាការសម្រាប់ទីក្រុងប៊ែរឡាំងឲ្យ បញ្ឈប់ជំនួយផ្នែកយោធា និងជំនួយផ្សេងទៀតដល់អ៊ីស្រាអែល និងផ្តល់មូលនិធិឡើងវិញដល់ទីភ្នាក់ងារជំនួយរបស់អង្គការសហប្រជាជាតិ នៅតំបន់ហ្កាហ្សា។