លោករីស៊ី ស៊ុណាក់ ( Rishi Sunak) បាននិយាយថា ចក្រភពអង់គ្លេស នឹងមិនអនុញ្ញាតឲ្យតុលាការបរទេសរារាំងផែនការរបស់ខ្លួន ក្នុងការនិរទេសជនអន្តោប្រវេសន៍ទៅកាន់ប្រទេសរ្វ៉ាន់ដា ហើយបានប្រកាសថា «គ្រប់គ្រាន់ គឺគ្រប់គ្រាន់» ដោយបញ្ជាក់ថា លោកនាយករដ្ឋមនមន្ត្រីកំពុងពិចារណាអំពីការបន្តសមាជិកភាពរបស់ចក្រភពអង់គ្លេសនៃអនុសញ្ញាអឺរ៉ុបស្តីពីសិទ្ធិមនុស្ស(ECHR)។

នៅពេលដែលត្រូវបានសួរថាតើក្រុមអភិរក្សនិយមដែលកំពុងគ្រប់គ្រង នឹងពិចារណាអំពីលទ្ធភាពនៃការចាកចេញពីECHR ដែរឬទេ លោកស៊ុណាក់ បានប្រាប់វិទ្យុ LBC នៅថ្ងៃពុធនេះថា៖«ខ្ញុំនឹងមិនអនុញ្ញាតឲ្យតុលាការបរទេសរារាំងសមត្ថភាពរបស់យើងក្នុងការដាក់មនុស្សនៅលើយន្តហោះ ហើយបញ្ជូនពួកគេទៅប្រទេសរ្វ៉ាន់ដានោះទេ» ។ «ខ្ញុំបានមកទីនេះដោយសមហេតុផល។ យើងបានធ្វើការយ៉ាងលំបាក។ យើងបានធ្វើឲ្យចំនួននេះថយចុះ។ យើងបានធ្វើអ្វីគ្រប់យ៉ាងត្រឹមត្រូវ។ យើងបានអនុម័តច្បាប់ថ្មីតាមរយៈសភា យើងបានដោះស្រាយកង្វល់របស់អ្នករាល់គ្នា ប៉ុន្តែនៅចំណុចនេះ គឺគ្រប់គ្រាន់ហើយ»។

លោកស៊ុណាក់ បាននិយាយ ចំពេលមានការរំពឹងទុកថា លោកអាចប្តេជ្ញាចិត្តឲ្យក្រុមអ្នកអភិរក្សរបស់ខ្លួន ក្នុងការដកខ្លួនចេញពីECHR ដើម្បីធានាថា ចក្រភពអង់គ្លេស អាចនិរទេសជនអន្តោប្រវេសន៍។ លោកបដិសេធមិនឲ្យគេទាញភ្ជាប់ជាពិសេសទៅលើថាតើលោកនឹងដាក់ការប្តេជ្ញាចិត្តនោះ នៅក្នុងសេចក្តីថ្លែងការណ៍បោះឆ្នោតរបស់គណបក្សលោកឬអត់។ លោកត្រូវតែរៀបចំការបោះឆ្នោតជាតិ នៅដំណាច់ខែមករា ហើយបានរំលឹកឡើងវិញនូវការរំពឹងទុករបស់លោកថា ប្រទេសនេះ នឹងទៅបោះឆ្នោតនៅឆមាសទីពីរនៃឆ្នាំនេះ។