អ្នកស្រី Amany Mansour ដែលជាជនប៉ាឡេស្ទីនមួយរូបរស់នៅក្នុងតំបន់ហ្កាហ្សាស្រ្ទីប គ្មានអ្វីអបអរច្រើននោះទេនៅថ្ងៃដំបូងនៃពិធីបុណ្យមូស្លីម Eid al-Fitr ពេលដែលអ្នកស្រីទៅលេងផ្នូរកូនប្រុសរបស់គាត់នៅទីក្រុង Rafah ។

ជនប៉ាឡេស្ទីនផ្សេងទៀត ធ្វើរឿងដូចគ្នា ដោយពួកគេសម្រេចចិត្តមកនៅក្បែរមនុស្សជាទីស្រលាញ់របស់ពួកគេ ដែលត្រូវបានសម្លាប់នៅក្នុងសង្រ្គាមរវាងអ៊ីស្រាអែល និងក្រុមហាម៉ាស់ ។

អ្នកស្រី Mansour និយាយថា ពេលខ្ញុំគិតដល់ពិធីបុណ្យ Eid លើកមុន វាពិតជាអស្ចារ្យខ្លាំងណាស់នៅក្នុងជីវិតរបស់ខ្ញុំ ដោយសារតែកូនប្រុសរបស់ខ្ញុំនៅក្បែរខ្ញុំ នៅក្នុងរង្វង់ដៃរបស់ខ្ញុំ ។

Eid al-Fitr គឺជាពិធីបុណ្យបញ្ចប់ខែបុណ្យតមអាហាររ៉ាម៉ាដានរបស់អ៊ីស្លាម ដែលចាប់ផ្តើមនៅតំបន់ហ្កាហ្សា កាលពីថ្ងៃពុធ ប៉ុន្តែមាននូវភាពសប្បាយរីករាយតិចតួចបំផុតសម្រាប់ជនប៉ាឡេស្ទីនក្នុងឆ្នាំនេះ ។

ខណៈពេលនោះដែរ ក្រសួងសុខាភិបាលហ្កាហ្សា បាននិយាយថា ពលរដ្ឋប៉ាឡេស្ទីនយ៉ាងហោចណាស់១៤នាក់បានស្លាប់ កាលពីថ្ងៃអង្គារ ក្នុងអំឡុងការវាយប្រហារតាមអាកាសរបស់អ៊ីស្រាអែល លើជំរំ Nuseirat ក្នុងតំបន់ហ្កាហ្សា ។

ទីភ្នាក់ងារសារព័ត៌មានផ្លូវការ Wafa របស់ដែនដីប៉ាឡេស្ទីន រាយការណ៍ថា ការវាយប្រហារដែលបានបង្កឲ្យរងរបួសមនុស្សជាច្រើននាក់ដែរនោះ បានកំណត់គោលដៅលើទីតាំងលំនៅឋានក្នុងជំរំជនភៀសខ្លួន Nuseirat នៅផ្នែកភាគកណ្តាលនៃតំបន់ហ្កាហ្សា ។

ការវាយប្រហារតាមអាកាសផ្សេងទៀត ត្រូវបានគេរាយការណ៍នៅទីក្រុង Deir al-Balah នៅទីក្រុងហ្កាហ្សា និងទីក្រុង Rafah នៅភាគខាងត្បូងតំបន់ហ្កាហ្សាស្រ្ទីប ៕