ក្រសួងការបរទេសចិន នៅថ្ងៃពុធ (១០ មេសា) បាននិយាយថា ខ្លួនមានការព្រួយបារម្ភ ចំពោះអ្វីដែលខ្លួនហៅថា វិធានការរើសអើងរបស់សហភាពអឺរ៉ុប (EU) ប្រឆាំងនឹងក្រុមហ៊ុនរបស់ប្រទេសខ្លួន បន្ទាប់ពីប្លុកនេះ បាននិយាយថា ខ្លួននឹងស៊ើបអង្កេតការឧបត្ថម្ភធនដែលទទួលបានពីអ្នកផ្គត់ផ្គង់ទួរប៊ីនខ្យល់របស់ចិន ដោយការធ្វើបែបនេះប៉ះពាល់ដល់ក្រុមហ៊ុនក្នុងបណ្ដាប្រទេសរបស់ប្លុក។

ការស៊ើបអង្កេតដែលត្រូវបានប្រកាស កាលពីថ្ងៃអង្គារ (ទី៩ ខែមេសា) បង្ហាញពីចំណាត់ការចុងក្រោយបង្អស់ ក្នុងការជំរុញរបស់អឺរ៉ុប និងសហរដ្ឋអាមេរិក ដើម្បីការពារក្រុមហ៊ុនរបស់ពួកគេពីអ្វីដែលពួកគេចាត់ទុកថា ជាការប្រកួតប្រជែងមិនយុត្តិធម៌ពីការនាំចូលបច្ចេកវិទ្យាស្អាតដែលឧបត្ថម្ភធនដោយរដ្ឋពីប្រទេសចិន។

ទោះបីជាក្រុមហ៊ុនក្នុងស្រុក ដូចជា Siemens Energy និង Vestas នៅតែផ្គត់ផ្គង់ទួរប៊ីនខ្យល់ភាគច្រើនដល់កសិដ្ឋានខ្យល់របស់តំបន់អឺរ៉ុបក៏ដោយ ក៏ពួកគេប្រឈមនឹងការប្រកួតប្រជែងដ៏តានតឹងពីផលិតផលចិនដែលមានតម្លៃទាប ដោយបានគំរាមកំហែងដល់ស្ថានភាពរបស់ក្រុមហ៊ុនទាំងនោះ ក្នុងការប្រណាំងប្រជែងជាសកល ដើម្បីអភិវឌ្ឍទួរប៊ីនដែលមានប្រសិទ្ធភាព និងតម្លៃថោកជាងនេះ។

យោងតាមសមាគមឧស្សាហកម្មដែលមានមូលដ្ឋាននៅទីក្រុងប៊្រុចសែល ប្រទេសបែលហ្ស៊ិក គឺក្រុមប្រឹក្សាថាមពលខ្យល់សកល (Global Wind Energy Council) បានឲ្យដឹងថា រហូតមកដល់ពេលនេះ ប្រទេសចិនមានសមត្ថភាពផលិតទួរប៊ីនខ្យល់ដ៏ធំជាងគេបំផុតរបស់ពិភពលោក ដោយស្មើនឹង ៦០ភាគរយនៃថាមពល ១៦៣ជីហ្គាវ៉ាត់ (GW) នៅទូទាំងពិភពលោក ក្នុងឆ្នាំ២០២៣។ ការិយាល័យស្រាវជ្រាវ BloombergNEF ប្រាប់ថា តម្លៃសម្រាប់ទួរប៊ីនរបស់ចិន មានតម្លៃប្រហែល ២០ភាគ ទាបជាងផលិតផលរបស់គូប្រជែងសហរដ្ឋអាមេរិក និងអឺរ៉ុប៕