ប្រជាជនជប៉ុនកាលពីថ្ងៃអង្គារ (ទី៩ ខែមេសា) បាជួបជុំគ្នាតវ៉ាប្រឆាំងនឹងកិច្ចសហប្រតិបត្តិការយោធាបន្ថែមទៀតរបស់រដ្ឋាភិបាលជាមួយសហរដ្ឋអាមេរិក ដែលពួកគេមើលឃើញថា ជាផ្លូវដែលមិនអាចត្រឡប់បាន ក្នុងការឆ្ពោះទៅរកការមានសង្រ្គាម។

នាយករដ្ឋមន្ត្រីជប៉ុន លោក Fumio Kishida បានចាប់ផ្តើមដំណើរទស្សនកិច្ចរបស់លោកទៅកាន់សហរដ្ឋអាមេរិក កាលពីថ្ងៃចន្ទ (ទី៨ ខែមេសា)។ មុនពេលចេញដំណើរ លោក Kishida បាននិយាយថា ដំណើរទស្សនកិច្ចរបស់លោកនឹងជំរុញកិច្ចសហប្រតិបត្តិការ រវាងប្រទេសជប៉ុន និងសហរដ្ឋអាមេរិកបន្ថែមទៀតលើវិស័យនានា ដូចជាយោធាជាដើម ក្នុងនោះរួមទាំងការបង្កើតប្រព័ន្ធបញ្ជាកិច្ចសហប្រតិបត្តិការ រវាងកងកម្លាំងស្វ័យការពារជប៉ុន (JSDF) និងកងកម្លាំងបង្រួបបង្រួមរបស់សហរដ្ឋអាមេរិក (USFJ) ដោយបង្កើតមជ្ឈមណ្ឌលអភិវឌ្ឍន៍ និងផលិតឧបករណ៍យោធារួមគ្នា និងផ្តល់ជំនួយថែទាំ សម្រាប់នាវាយោធាអាមេរិកដែលឈរជើងក្នុងប្រទេសជប៉ុន។

និស្សិតក្នុងស្រុកម្នាក់បាននិយាយថា៖ «ខ្ញុំគិតថា វាកំពុងធ្វើដំណើរឆ្ពោះទៅរកសង្រ្គាម។ កិច្ចប្រជុំជប៉ុន-អាមេរិកលើកនេះ គឺជាសន្និសីទសង្រ្គាម» ដោយមានគោលបំណងលើកកម្ពស់សមាហរណកម្មនៃ JSDF និង USFJ។ ក្នុងនាមជានិស្សិតជប៉ុនម្នាក់ ខ្ញុំត្រូវតែបញ្ចេញសំឡេងប្រឆាំងរបស់ខ្ញុំ»។

ចំណែកអ្នកស្រុកម្នាក់ទៀត បាននិយាយថា៖ «ប្រទេសជប៉ុនបានចាប់ផ្តើមសង្រ្គាមឈ្លានពានលើប្រទេសអាស៊ីជាច្រើន អំឡុងសង្គ្រាមលោកលើកទី២។ ដោយមើលឃើញពីប្រវត្តិសាស្រ្តរបស់ជប៉ុនពីការឈ្លានពានខាងយោធានិយម ការជំរុញបច្ចុប្បន្នរបស់រដ្ឋាភិបាលលោក Kishida ដល់សម្ព័ន្ធភាពជប៉ុន-អាមេរិក កំពុងនាំប្រទេសជប៉ុនទៅកាន់ផ្លូវឆ្ពោះទៅរកសង្រ្គាមជាថ្មីម្ដងទៀត»៕