បុរសជនជាតិប៉េរូអាចនឹងក្លាយជាមនុស្សមានវ័យចំណាស់ជាងគេបំផុតនៅលើពិភពលោកដែលនៅមានជីវិត បើសិនជាអំណះអំណាងថ្មីរបស់ក្រុមអាជ្ញាធរពីបុរសវ័យ ១២៤ឆ្នាំម្នាក់ កើតនៅឆ្នាំ ១៩០០ ត្រូវបានគេបញ្ជាក់ថាជាការពិតហើយនោះ ។

រដ្ឋាភិបាលប៉េរូ បានអះអាងថា លោកតា Marcelino Abad មកពីតំបន់ភាគកណ្តាល Huanuco របស់ប៉េរូ មានអាយុ ១២៤ឆ្នាំ ដែលនឹងធ្វើឲ្យគាត់ក្លាយជាមនុស្សមានវ័យចំណាស់ជាងគេបំផុតនៅមានជីវិតរបស់ពិភពលោក ។

ក្រុមអាជ្ញាធរប៉េរូ និយាយថា ពួកគេកំពុងជួយលោក Abad ដាក់ពាក្យនៅសៀវភៅកំណត់ត្រាពិភពលោក Guinness World Records សម្រាប់ការបញ្ជាក់ផ្ទៀងផ្ទាត់ដោយឯករាជ្យ ។

ទោះបីជាយ៉ាងណាក៏ដោយ អង្គការមួយនេះ នៅពុំទាន់បានឆ្លើយតបភ្លាមៗនោះទេ ចំពោះសំណើរសុំសេចក្តីអត្ថាធិប្បាយ ។

បច្ចុប្បន្ន Guinness World Records ចុះបញ្ជីបុរសនៅរស់មានវ័យចំណាស់ជាងគេបំផុត គឺជាបុរសជនជាតិអង់គ្លេសវ័យ ១១១ឆ្នាំ ដែលបានឈ្នះកំណត់ត្រាមួយនេះ ក្នុងខែនេះ ក្រោយការស្លាប់របស់បុរសជនជាតិវេណេស៊ុយអេឡា ដែលមានអាយុ ១១៤ឆ្នាំ ។

ចំណែកឯស្រ្តីមានវ័យចំណាស់ជាងគេបំផុតនៅលើពិភពលោកដែលនៅមានជីវិត មានអាយុ ១១៧ឆ្នាំ ខណៈដែលមនុស្សចាស់បំផុតដែលត្រូវបានបញ្ជាក់ផ្ទៀងផ្ទាត់ មានអាយុ ១២២ឆ្នាំ ៕