អាមេរិក៖ ក្រុមពន្លត់អគ្គិភ័យកាលពីថ្ងៃសុក្របានប្រកាស ពីការបញ្ចប់ការស្វែងរកសាកសពនៅអគារខុនដូនៅរដ្ឋ Florida ដែលបានបាក់រលំ ដោយបញ្ចប់ការងាររយៈពេលមួយខែ ដើម្បីយកកម្ទេចកំទីចេញ។
ក្រុមអ្នកស្វែងរក និងជួយសង្គ្រោះក្នុងទីក្រុង Miami-Dade បានដកខ្លួនចេញពីទីតាំងបាក់រលំអគារកាលពីថ្ងៃសុក្រ នៅក្នុងក្បួនរថយន្តពន្លត់អគ្គិភ័យ និងយានយន្តផ្សេងទៀតដោយបើករថយន្តយឺតៗ ទៅកាន់ទីស្នាក់ការកណ្តាលរបស់ពួកគេ ដើម្បីធ្វើសន្និសីទព័ត៌មានប្រកាសថា ការស្វែងរកត្រូវបានបញ្ចប់ជាផ្លូវការហើយ។ នៅក្នុងពិធី ប្រធានក្រុមពន្លត់អគ្គិភ័យ លោក Alan Cominsky បានសំពះទៅកាន់ក្រុមពន្លត់អគ្គិភ័យ ដែលធ្វើការផ្លាស់ប្ដូរវេនគ្នា ១២ម៉ោងពេលកំពុងបោះជំរំនៅទីតាំងនោះ។
ការបាក់រលំអគារនៅថ្ងៃទី២៤ ខែមិថុនានៅទីក្រុង Miami-Dade រដ្ឋ Florida បណ្ដាលឲ្យមនុស្ស ៩៧នាក់ស្លាប់ ដោយយ៉ាងហោចណាស់មានអ្នកបាត់ខ្លួនម្នាក់ទៀត ដែលត្រូវបានគេស្គាល់អត្តសញ្ញាណ។ អ្នកវិទ្យាសាស្ត្រនៅតែធ្វើការនៅឡើយ រួមទាំងការពិនិត្យមើលកម្ទេចកំទីនៅឃ្លាំង។ មិនមានសាកសពផ្សេងទៀតត្រូវបានរកឃើញ នៅទីតាំងអគារបាក់រលំនេះទេ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
