ឈានមកដល់ថ្ងៃទី ១១ ខែមេសា ឆ្នាំ ២០២៤នេះ ប្រជាពលរដ្ឋចាប់ផ្ដើម​ធ្វើដំណើរ​ចាក​ចេញ​ពី​រាជ​ធានី​ភ្នំពេញ ទៅតាមបណ្ដារាជធានី-ខេត្ត។ ការចាកចេញនេះ ក្នុងគោលដៅ​ទៅ​លេង​ស្រុក​កំណើត និងខ្លះទៅដើរលេងកម្សាន្ត សម្រាប់ឱកាសពិធីបុណ្យចូលឆ្នាំប្រពៃណីជាតិខ្មែរ។

ទិដ្ឋភាពចរាចរណ៍នៅតាមដងផ្លូវ នៅថ្ងៃទី ១១ ខែមេសា នេះ ចាប់​ផ្ដើម​មាន​ភាព​មមា​ញឹក​គួរ​ឱ្យ​កត់​សម្គាល់ ពិសេសគឺការធ្វើដំណើរក្នុងគោលដៅឆ្ពោះទៅបណ្ដាខេត្ត។ ប្រជាពលរដ្ឋខ្លះ ធ្វើ​ដំណើរ​តាមម៉ូតូដោយខ្លួនឯងសម្រាប់អ្នកមានស្រុកកំណើតជិត រីឯប្រជាពលរដ្ឋ​ដែល​មាន​ស្រុក​កំណើត​ឆ្ងាយ​ធ្វើ​ដំណើរតាមរថយន្តផ្ទាល់ខ្លួន ឬធ្វើដំណើរតាមក្រុមហ៊ុនដឹកអ្នកដំណើរ។

សម្រា​ប់ប្រជាពលរដ្ឋដែលកំពុងរង់ចាំឡើងរថយន្តឆ្ពោះទៅខេត្តសៀមរាប នៅថ្ងៃនេះ ម្នាក់​សុទ្ធ​តែ​បង្ហាញ​នូវ​ទឹកមុខសប្បាយរីករាយ។ អ្នកខ្លះទៅខេត្ត សៀមរាប ព្រោះជាស្រុកកំណើត រីឯអ្នក​ខ្លះ​ធ្វើ​ដំណើរ​ឆ្ពោះ​ទៅខេត្ត សៀមរាប ដើម្បីដើរលេងកម្សាន្ត។ ពួកគេមើលឃើញថា ប្រជាពលរដ្ឋគ្រប់រូប សុទ្ធតែ​មានភាពសប្បាយរីករាយ សម្រាប់ឱកាសចូលឆ្នាំប្រពៃណីជាតិខ្មែរ ។

ពាក់ព័ន្ធនឹងការធ្វើដំណើរនេះ លោក មឿន សម្បត្តិ អ្នកគ្រប់គ្រងទូទៅ នៅក្រុម​ហ៊ុន​ដឹក​អ្នក​ដំណើរ ឡារីតា លើកឡើងថាកំណើនការធ្វើដំណើរទៅបណ្ដាខេត្ត ចាប់ផ្ដើមកើន​តាំង​ពី​ដើម​សប្ដាហ៍​មក​ម្លេះ។ ចាប់ពីថ្ងៃនេះទៅ ចំនួនការធ្វើដំណើរគឺកាន់តែច្រើនបន្ថែមទៀត។ ជាការឆ្លើយ​ត​ប​នឹង​តម្រូវការរបស់ប្រជាពលរដ្ឋ ក្រុមហ៊ុនរបស់លោកក៏បាន បន្ថែមនូវរថយន្ត ក៏ដូចជា​បន្ថែម​ម៉ោង​ចេញ​ដំណើរ រហូតដល់ម៉ោង ១២ យប់ផងដែរ។

ខណៈមាន​តម្រូវការធ្វើដំណើរខ្ពស់បែបនេះ លោកលើកឡើងថា​ក្រុមហ៊ុន​នៅ​តែ​រក្សា​គោលការណ៍​របស់​ខ្លួន​ គឺរក្សាតម្លៃដើម ប្រកាន់ខ្ជាប់វិធានការសុវត្ថិភាពបើកបរ គោរពច្បាប់ចរាចរណ៍ ដើម្បី​ធានា​សុវត្ថិភាព​ជូនអ្នកធ្វើដំណើរ។

មុននឹងការចេញដំណើរ កញ្ញា ហន សុខហ៊ាង ជាអ្នកបើកបរស្ត្រីលើកឡើងថា កាត​ព្វកិច្ច និង​ទំនួល​ខុស​ត្រូវសំខាន់របស់អ្នកបើកបរអាជីព គឺដឹកជញ្ជូនអ្នក​ដំណើរ​ដំណើរ​ឱ្យ​ទៅ​ដល់​គោល​ដៅ​ប្រកប​ដោយ​សុវត្ថិភាពខ្ពស់។

សម្រាប់ឱកាសពិធីបុណ្យចូលឆ្នាំប្រពៃណីជាតិខ្មែរនេះ រាជរដ្ឋាភិបាលកម្ពុជា ក៏បាន​សម្រេច​ឱ្យ​ប្រើប្រាស់​រថយន្តក្រុងដើម្បីដឹកជញ្ជូនប្រជាពលរដ្ឋទៅស្រុកកំណើតដោយមិនគិតថ្លៃផងដែរ។ ចំនួន​រថយន្តក្រុងសរុប គឺ៤៥៥គ្រឿង ក្នុងនោះសម្រាប់ការដឹកជញ្ជូនតាមបណ្ដាខេត្តចំនួន ៣៩៥គ្រឿង រីឯការដឹកជញ្ជូននៅរាជធានីភ្នំពេញ ចំនួន ៦០គ្រឿង។ ការ​ធ្វើ​ដំណើរ​ដោយ​មិន​គិត​ថ្លៃ​នេះ មានរយៈពេល ៦ថ្ងៃ ដោយចាប់ផ្ដើមពីថ្ងៃទី ១២ រហូតដល់ថ្ងៃទី ១៧ ខែមេសា ឆ្នាំ ២០២៤​៕ អត្ថបទ៖ គឹមហុក