ស្របពេលដែលរដ្ឋបាលខេត្តកណ្តាលជំរុញឲ្យអាជ្ញាធរមូលដ្ឋានតាមក្រុងស្រុកនានារៀបចំកម្មវិធីសង្ក្រាន្ត តាមក្រុងស្រុកឃុំសង្កាត់របស់ខ្លួននៅពេលនេះ ក្រុងស្រុកនានានោះ បានសហការ​រៀបចំ​កម្ម​វិធី​សង្ក្រាន្ត បង្កលក្ខណៈជូនពលរដ្ឋមូលដ្ឋាន និងទេសចរជាតិអន្តរជាតិ ចូលរួម​កម្សាន្ត​សប្បាយ​រីករាយអបអរសាទរពិធីបុណ្យចូលឆ្នាំថ្មី ប្រពៃណីខ្មែរ ឆ្នាំរោង នឹងឈាចូល​មក​ដល់​នៅ​ថ្ងៃ​ទី១៣ ខែមេសា ឆ្នាំ២០២៤នេះ។

ពលរដ្ឋនៅក្រុងអរិយក្សត្រ ខេត្តកណ្តាល បានថ្លែងប្រាប់ BTV នៅថ្ងៃទី១១ ខែមេសានេះថា ឆ្នាំ​នេះ​ពួក​គេទាំងអស់គ្នាមានការពេញចិត្តសប្បាយរីករាយជាមួយរដ្ឋបាលក្រុងអរិយក្សត្រ ដែល​បាន​រៀបចំ​កម្ម​វិធីសង្ក្រាន្តក្រុងអរិយក្សត្រ ជាលើកដំបូង។

ចំណែកមន្ត្រី និងក្រុមយុវជនក្រុងអារីក្សត្រ ថ្លែងថា ទីតាំង​ប្រារព្ធ​កម្ម​វិធី​សង្ក្រាន្ត​ក្រុង​អរិយក្សត្រ​ដែល​នឹង​ប្រារព្ធធ្វើធំនៅជាប់វត្តអរិយក្សត្រនេះគឺរៀបចំបានរួចរាល់បានប្រមាណ៩០% ហើយ​តាម​គ្រោង​ទុក​នៅក្នុ​ងកម្មវិធីសង្ក្រាន្តនេះ នឹងរៀបចំកម្មវិធីសប្បាយជាច្រើន ដូចជា ការធ្វើ​ពិធី​សាសនា​ទទួល​ទេវតា កម្មវិធីលេងល្បែងកម្សាន្តប្រជាប្រិយទាំង១០ប្រភេទ និងការរាំ​លេង​កម្សាន្ត​តាម​បែប​ខ្មែរ នៅក្នុងតំបន់ត្រជាក់ជាដើម ខណៈនៅក្នុងអំឡុងពេលនេះ ក្រុមការងារយុវជន បាន​និង​កំពុង​ហាត់​សម​ នូវការរាំ និងលេងល្បែងប្រជាប្រិយតាមបែបខ្មែរផងដែរ។

រដ្ឋបាលសាលាខេត្តកណ្តាល បានឲ្យដឹងថា មកដល់ពេលនេះ អាជ្ញាធរ​មូលដ្ឋាន​តាម​ក្រុង​ស្រុក​ទាំង​អស់ នៅទូទាំងខេត្ត គឺបាននាំគ្នារៀបចំទីតាំងកម្មវិធីសង្ក្រាន្ត អបអរសាទរពិធីបុណ្យចូលឆ្នាំថ្មី ប្រពៃណីខ្មែរ របស់ខ្លួនសម្រេចបានប្រមាណ៩០% ហើយក៏​មាន​អាជ្ញាធរ​មូល​ដ្ឋាន​តាម​ឃុំ​សង្កាត់​ជា​ច្រើន​ទៀត រៀបចំកម្មវិធីសង្ក្រាន្តតាមភូមិឃុំសង្កាត់ តាមរមណីយដ្ឋាន​ទេសចរណ៍​ជា​ច្រើន​កន្លែង​ទៀត​ផងដែរ៕ អត្ថបទ ស៊ុម សុខជា