កណ្ដាល ៖ ឯកឧត្តម ឡាវ វ៉ាន់ រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំខ្ពប ស្រុកស្អាង ខេត្តកណ្តាល បានអញ្ជើញប្រគល់កង់ដល់សិស្សឆ្នើម ប្រចាំឆមាសទី១ ឆ្នាំសិក្សា២០២៣-២០២៤ នៅអនុវិទ្យាល័យខ្ពប ស្ថិតនៅឃុំខ្ពប ស្រុកស្អាង ខេត្តកណ្តាល, នារសៀលថ្ងៃទី១០ ខែមេសា ឆ្នាំ២០២៤។

​លោក ហ៊ង សុគា នាយកអនុវិទ្យាល័យខ្ពប បានឲ្យដឹងថា ថ្ងៃនេះ បង ឬពូ អាណាព្យាបាល មានសេចក្តីសោមនស្សរីករាយ ដែលបានចូលរួមក្នុងក្នុងពិធីប្រគល់កង់ជូនសិស្សឆ្នើម ប្រចាំឆមាសទី១ ឆ្នាំសិក្សា២០២៣-២០២៤ ចំនួន៤៥នាក់ និងប្អូនៗជួបការលំបាក ចំនួន ៥ នាក់ នៅអនុវិទ្យាល័យខ្ពប។

នាឱកាសនោះឯកឧត្តម ឡាវ វ៉ាន់ សូមថ្លែងការកោតសរសើរជូនថ្នាក់ដឹកនាំសាលា និងលោកគ្រូ អ្នកគ្រូ ដែលបានរួមចំណែកយ៉ាងសកម្មក្នុង ការងារវិស័យអប់រំនេះ បង ឬ ពូពិតជារំភើប និងសូមសរសើរចំពោះការខិតខំប្រឹងប្រែងរៀនសូត្ររបស់ប្អូនៗ រហូតទទួលបាន លទ្ធផលល្អ លេខ១ ដល់ លេខ ៣ និងអរគុណដល់តួអង្គសំខាន់ៗ។ លទ្ធផលនាថ្ងៃនេះ កើតចេញពីតួអង្គសំខាន់ៗ៖លោកនាយកសាលា ៖ បានដឹកនាំសាលារៀនឱ្យមានការអភិវឌ្ឍ ផ្តល់ទីតាំងល្អដល់ប្អូនៗ។ លោកគ្រូ អ្នកគ្រូ ៖ បង្ហាត់បង្រៀនប្អូនៗដោយការយកចិត្តទុកដាក់បំផុត។ ដូចពាក្យខ្មែរ តែនិយាយថា " នៅផ្ទះម្តាយទីទៃ ទៅព្រៃម្តាយតែមួយ” និងបន្ថែមថា គ្រូបង្រៀនគឺជាអ្នក មានគុណរបស់ប្អូនៗ ” ។ ពិតណាស់ថា ជីវិតជាគ្រូបង្រៀនមិនអាចក្លាយជាមហាសេដ្ឋីបានទេ តែទឹកចិត្តគ្រូបង្រៀនធំធេងណាស់។ ឪពុកម្តាយ អ្នកអាណាព្យាបាល៖ លោកពុក អ្នកម្តាយដែលតែងតែផ្តល់ឱកាស និងទំនុកបម្រុង គ្រប់យ៉ាងឱ្យប្អូនៗមានឱកាសបានចូលសាលារៀន និងរៀនសូត្របានជាប់លាប់។ ការខិតខំរបស់ប្អូន ៖ សេចក្តីព្យាយាម ខិតខំរៀនសូត្រ និងតស៊ូធ្វើឲ្យប្អូនៗទទួលបានលទ្ធផលល្អ និង

តួអង្គចុងក្រោយ គឺថ្នាក់ដឹកនាំគ្រប់លំដាប់ថ្នាក់៖ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំ និងដាក់ចេញនូវយុទ្ធសាស្ត្រ ដោយយកការអភិវឌ្ឍធនធានមនុស្ស ជាវិស័យអាទិភាព។

ជាចុងក្រោយឯកឧត្តម ឡាវ វ៉ាន់ បានសង្កត់ធ្ងន់ថា ការប្រគល់កង់ជូនប្អូនៗចំណាត់ថ្នាក់លេខ១ ដល់លេខ៣ ជាកាដូសម្រាប់បុណ្យចូលឆ្នាំថ្មី ប្រពៃណីជាតិ ខ្មែរខាងមុខនេះ កាដូនេះមិនច្រើនទេ តែវាជាទឹកចិត្តបន្តិចបន្តួចដែលមានចំពោះប្អូនៗ និងក្មួយ។ ឆ្លៀតក្នុងឱកាសនេះ ឯកឧត្តម សូមពាំនាំនូវបណ្តាំផ្ញើសួរសុខទុក្ខពី ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង ដែលឯកឧត្តម តែងតែយកចិត្តទុកដាក់ និងគិតគូរពីសុខទុក្ខរបស់លោកគ្រូ អ្នកគ្រូ អ៊ំ ពូមីង ពុកម៉ែ បង ប្អូន និងក្មួយៗទាំងអស់គ្នា៕

អត្ថបទ ៖ រដ្ឋា