ភ្នំពេញ៖ ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំរោង ឆស័កព.ស២៥៦៨ គ្រឹស្ត សករាជ ២០២៤ គណៈកម្មការផ្សារអូរឬស្សី បានរៀបចំពិធីសូត្រមន្តរាប់បាត្រព្រះសង្ឃចំនួន៧អង្គ ក្នុងន័យចូលរួមអបអរទេវតាឆ្នាំថ្មី ព្រះនាម មហោធរទេវី ជាបុត្រីទី៧ របស់កបិលមហាព្រហ្ម ដែលនឹងចុះមកគ្រប់គ្រងភពផែនដីជំនួសទេវតាឆ្នាំចាស់នាវេលាម៉ោង២២ និង២៤នាទី ថ្ងៃទី១៣ ខែមេសា ឆ្នាំ២០២៤ ​ដោយមានការអញ្ជើញចូលរួមពីលោក ឡយ ស៊ាងអាង ប្រធាន​គណៈកម្មការផ្សារអូរឬស្សី និងបងប្អូនអាជីវករផ្សារអូរឬស្សីទាំងអស់គ្នា។

ពិធីនេះ បានធ្វើឡើងនៅព្រឹកថ្ងៃទី១១ ខែមេសា ឆ្នាំ២០២៤ នៅទីស្នាក់ការផ្សារអូរឬស្សីផ្ទាល់តែម្ដង និងបានបង្ហាញឲ្យឃើញពីការគោរពប្រតិបត្តិប្រពៃណីទំនៀមទំលាប់ជាតិ ពិសេស​ក្នុងឱកាសទទួលទេវតាឆ្នាំថ្មី ដើម្បីបណ្តេញគ្រោះចង្រៃផងទាំងពួង ដែលកើតមានពីឆ្នាំចាស់ និង​សុំពរជ័យពីទេវតាឆ្នាំថ្មីក៏ដូចជារួមចំណែកថែរក្សាប្រពៃណីទំនៀមទំលាប់ និងវប្បធម៌ជាតិ​ដ៏ល្អផូរផង់។

នេះជាការចាប់ផ្តើមនៃការ​ប្រារព្ធ​ពិធីសូត្រមន្តរាប់បាត្ររបស់ គណៈកម្មការផ្សារអូរឬស្សី ក៏ដូច​ស្ថាប័ននានា និងប្រជាពលរដ្ឋក្រោមការដឹកនាំរបស់រាជរដ្ឋាភិបាលអាណត្តិទី៧ ឆ្នាំទី១ ដែលមាន​សម្តេចបវរធិបតី ហ៊ុន ម៉ាណែត ជានាយករដ្ឋមន្ត្រី និងស្របពេលដែលកម្ពុជាកំពុងមាន​សុខ​សន្តិភាព និងការអភិវឌ្ឍលើគ្រប់វិស័យ ជាពិសេសការអភិវឌ្ឍន៍នៅរាជធានីភ្នំពេញធ្វើឱ្យជីវភាព​រស់នៅរបស់ប្រជាពលរដ្ឋកាន់តែប្រសើរឡើងក្រោមម្លប់សន្តិភាព។ប៉ុន្តែឆ្នាំនេះ ពិធីបុណ្យចូលឆ្នាំ​ថ្មីប្រពៃណីជាតិខ្មែរត្រូវបានរៀបចំឱ្យមានភាពអធិកអធមកាន់តែផុលផុស​និងបង្កភាពសប្បាយ​រីករាយ​ជូនប្រជាពលរដ្ឋតាមរយៈការរៀបចំឱ្យមានសង្ក្រាន្តនៅគ្រប់ទីកន្លែង ទាំងសង្ក្រាន្តវត្តភ្នំ ក៏ដូចសង្ក្រាន្តតាមខណ្ឌទាំង១៤ ​សង្កាត់ទាំង១០៥ និងផ្សាររដ្ឋទាំង២៥ផ្សារផងដែរ ព្រមទាំង​តាមវត្តអារាម សាលារៀន ក្រុមហ៊ុនឯកជន និងមានការជួបជុំកំសាន្តសប្បាយរីករាយ។

សូមបញ្ជាក់ផងដែរ ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិនេះដែរ រដ្ឋបាល​រាជធានីភ្នំពេញ បានប្រកាសជូនដំណឹងពីការ​ប្រារព្ធ​កម្មវិធីសង្ក្រាន្តវត្តភ្នំនៅរមណីដ្ឋាន​វប្បធម៌​ប្រវត្តិសាស្ត្រវត្តភ្នំ មានរយៈពេល៣ថ្ងៃ ជាមួយគ្នានេះ រដ្ឋបាលរាជធានីភ្នំពេញក៏បានជូន​ដំណឹង​ពីការហាមឃាត់ មិន​អនុញ្ញាត​ឱ្យលេងល្បែងដែលមិនមែនជាប្រពៃណីវប្បធម៌ជាតិ និង​ត្រូវប្រកាន់ខ្ជាប់សេចក្តីថ្លៃថ្នូរ ចូលរួមទប់ស្កាត់រាល់បទល្មើសផ្សេងៗ​ដែលអាចកើតមានឡើង​ក្នុងឱកាសបុណ្យចូលឆ្នាំថ្មីប្រពៃណីជាតិ ចូលរួម​ទប់ស្កាត់​ពីគ្រោះអគ្គិភ័យការបើកបរត្រូវគោរពច្បាប់​ចរាចរណ៍ផ្លូវគោក បើកបរកុំពិសារគ្រឿងស្រវឹងជាដើម៕អត្ថបទ ៖ កុម្ភៈ