កំពង់ស្ពឺ៖ ដោយថ្ងៃឈប់សម្រាកបុណ្យចូលឆ្នាំប្រពៃណីជាតិខ្មែរ ត្រូវបានអនុញ្ញាត​ឲ្យ​កម្មករ​និយោជិត​ឈប់សម្រាករយៈពេលជាច្រើនថ្ងៃ ដើម្បីជួបជុំក្រុមគ្រួសារនៅស្រុកកំណើត។ កម្មករ​កម្មការិនី បានជួបជុំគ្នាដើម្បីអបអរពិធីបុណ្យចូលឆ្នាំដែលនឹងឈានដល់នៅថ្ងៃទី១៣ ខែ​មេសា​ខាង​មុខ​នេះ មុននឹងឈប់សម្រាក ទៅលេងស្រុកកំណើតរៀងៗខ្លួន។

នៅក្នុងពិធីជប់លៀងអបអរឆ្នាំថ្មី នៅព្រឹកថ្ងៃទី១១ ខែមេសានេះ លោក ហ៊ូ ឆៅហ៊ុយ (Hu Chao Hui) នាយករោងចក្រស្បែកជើង អល វីន ស៊ូ (ខេមបូឌា) ឯ.ក បាន​មាន​ប្រសាសន៍​ប្រាប់​ព័ត៌មាន ប៊ីធីវី ឲ្យដឹងថា កម្មវិធីនេះរៀបចំឡើង ដើម្បីជាការលើកទឹកចិត្ត និងអរគុណ​ដល់​កម្មករ​និយោជិត​ ដែលបានប្រឹងប្រែងធ្វើការកន្លងមក ដោយមើលឃើញថា ការបញ្ជាទិញ​កំពុង​មាន​ការ​កើន​ឡើង​យ៉ាងឆាប់រហ័ស ដែលគិតមកដល់ពេលនេះ រោងចក្រទទួល​បាន​ការ​បញ្ជា​ទិញ​ស្បែក​ជើង​ពី​ចំនួន ៨ម៉ឺនគូ រហូតដល់ចំនួន ២១ម៉ឺនគូ។ លោកបានបន្តថា ទៅថ្ងៃអនាគត ប្រសិន​បើរោង​ច​​ក្រសម្រេចបានគោលដៅបន្តទៀត នឹងផ្តល់ប្រាក់​រង្វាន់​លើ​សមត្ថភាព​ផលិត​កម្ម​ដល់​កម្មករ​និយោជិត ព្រមទាំងការរៀបចំ​កម្ម​វិធី​សប្បាយៗ​ដើម្បី​លើក​ទឹកចិត្ត​ដល់​កម្មករ​ដែល​ខិតខំ​បំពេញ​ការងារ។

លោក គឹម ចាន់សំណាង ប្រធានសហភាពសិទ្ធិកម្មករកម្ពុជា បានឲ្យ ប៊ីធីវី ដឹងថា ជារៀងរាល់ឆ្នាំ កម្មករ កម្មការិនី នឹងបានឈប់សម្រាកពីការងារយ៉ាងហោចណាស់រយៈពេល១សប្តាហ៍ ពោល​គឺ​ច្រើន​ជាង​ពិធីបុណ្យនានា ដើម្បីជួបជុំជាមួយក្រុមគ្រួសារ និងសាច់ញាតិនៅឯស្រុកកំណើត។ លោក​បន្ត​ទៀតថា តាមទម្លាប់ ក្នុងឱកាសពិធីបុណ្យចូលឆ្នាំ ក្រៅពីធ្វើដំណើរ​ទៅ​ស្រុក​កំណើត​ជួប​ជុំ​ក្រុម​គ្រួសារ​ញាតិមិត្ត កម្មករនិយោជិត ក៏បាននាំគ្នាធ្វើចង្ហាន់ និងរៀបចំទេយ្យទាន​ផ្សេងៗ​ប្រគេន​ព្រះសង្ឃ បន្ទាប់មកជួបជុំសាច់ញាតិ ទៅលេងសង្រ្កានតាមភូមិឃុំ និងការលេងល្បែង​ប្រជាប្រិយ៍​ជា​ដើម ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។

ក្នុងកម្មវិធីខាងលើនេះ ក្រុមកម្មការិនីរោងចក្រ បានបង្ហាញនូវទឹកមុខសប្បាយរីករាយ និង​លើក​ឡើង​ថា ដោយសារការដឹកនាំដ៏ល្អឆ្នើមរបស់សម្តេចតេជោ ហ៊ុន សែន អតីតនាយករដ្ឋមន្រ្តី និង​សម្តេច​ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ទើបធ្វើឲ្យប្រជាពលរដ្ឋគ្រប់រូប ក៏ដូចជា​កម្មករ​រោងចក្រទាំងអស់បានជួបជុំគ្នា ប្រកបដោយភាពសប្បាយរីករាយក្រោមម្លប់សន្តិភាព។

ក្រុមកម្មការិនី បាននិយាយដោយទឹកមុខញញឹមទៀតថា ពួកគាត់ពិតជាសប្បាយចិត្តណាស់ ដែល​ទទួលការឈប់សម្រាកដោយមានប្រាក់ឈ្នួលរយៈពេលជាច្រើនថ្ងៃ ដើម្បី​ទៅ​លេង​ស្រុក​កំណើត ​ព្រោះបានទៅលេងឪពុកម្តាយ បងប្អូន និងមិត្តភ័ក្ត ដែលខកខាន​ជួប​ជុំ​គ្នា​យ៉ាង​យូរ​ដោយសារ​ជាប់​រវល់ការងារ។

ក្នុងឱកាសនេះ ភាគីរោងចក្រ សហជីព និងកម្មករ កម្មការិនី បាន​សម្តែង​ការ​ជូនពរ​ដល់​ថ្នាក់​ដឹកនាំ​គ្រប់​ជាន់ថ្នាក់នៃរាជរដ្ឋាភិបាលកម្ពុជា និងប្រជាជនខ្មែរ​ទាំង​មូល​នា​​ឱកាស​បុណ្យចូ​ល​ឆ្នាំ​ថ្មី​នេះ​ ឲ្យធ្វើដំណើរកម្សាន្តទីជិត ទីឆ្ងាយប្រកបដោយសុខសុវត្ថិភាព និងជួប​ប្រទះ​តែ​សេចក្តី​សុខ​គ្រប់​ប្រការ ជាពិសេសរក្សាសេចក្តីថ្លៃថ្នូរ និងចេះយោគយល់អធ្យាស្រ័យគ្នាក្នុងពេលបើកបរ៕អត្ថបទដោយ ឈិត បូរ៉ាវី