កណ្ដាល ៖ ឯកឧត្តម ឡាវ វ៉ាន់ រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំខ្ពប ស្រុកស្អាង ខេត្តកណ្តាល បានអញ្ជើញជាអធិបតីក្នុងកម្មវិធីបើកព្រឹត្តិការណ៍សង្ក្រាន្តវត្តខ្ពប ស្ថិតក្នុងបរិវេណវត្តខ្ពប ឃុំខ្ពប ស្រុកស្អាង ខេត្តកណ្តាល កាលពីរសៀលថ្ងៃទី១០ ខែមេសា ឆ្នាំ២០២៤។
ព្រះជោតិមុនី នី សារី ព្រះរាជាគណៈថ្នាក់កិត្តិយស និងជាព្រះចៅអធិការវត្តខ្ពប មានថេរដីកាបង្ហាញពីគោលបំណង និងអំពីការចូលរួមរវាងព្រះសង្ឃ និងពុទ្ធបរិស័ទ ក្នុងការសហការនិងអាចនិយាយបានថា វត្តអារាម និងពុទ្ធបរិស័ទ និងឈ្មោះល្បែងប្រជាប្រិយខ្មែរជាច្រើន ដែលលេងកម្សាន្តនាពេលនេះ ជាពិសេសចង់ឲ្យយុវជនជំនាន់ក្រោយ បានឃើញ បានស្គាល់ថា ល្បែងនេះ ជាល្បែងប្រជាប្រិយរបស់ខ្មែរយើង មានតាំងពីយូរលង់ណាស់មកហើយ និងជាការលើកតម្កើង ឲ្យតម្លៃចូលរួមថែរក្សាល្បែងប្រជាប្រិយខ្មែរយើងទាំងអស់គ្នា។
ចំណែកបងប្អូនប្រជាពលរដ្ឋ យុវជន ក្មេង ចាស់ ប្រុស ស្រី អញ្ជើញមកចូលរួមកម្មវិធីកម្សាន្តសង្រ្កាន្តឆ្នាំថ្មី២០២៤នេះ បានបង្ហាញចំណាប់អារម្មណ៍សប្បាយរីករាយ ដែលវត្តខ្ពប បានរៀបចំកម្មវិធីសង្រ្កាន្តឆ្នាំថ្មីនេះឡើង ដើម្បីគិតទៅដល់ប្រពៃណីខ្មែរយើង ក្នុងមួយឆ្នាំមានម្តង ហើយក៏បាននាំឲ្យយុវជន បានចូលរួមលេងកម្សាន្ត បានស្គាល់ពីប្រពៃណីខ្មែរ និងបានចូលរួមថែរក្សាប្រពៃណីវប្បធម៌ឲ្យបានគង់វង្ស។
ឆ្លៀតក្នុងឱកាសនោះឯកឧត្តម ឡាវ វ៉ាន់ រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំខ្ពប ពិតជាសូមសម្តែងនូវការកោតសរសើរយ៉ាងជ្រាលជ្រៅ ចំពោះព្រះតេជព្រះគុណព្រះចៅ អធិការវត្ត ក្នុងការផ្តួចផ្តើមកម្មវិធីដ៏ល្អនេះ សម្រាប់បងប្អូន និងក្មួយៗបានលេងកម្សាន្ត ផ្អែកតាមសង្ឃដីកា ព្រះតេជព្រះគុណព្រះចៅអធិការវត្តបានដឹកនាំព្រះសង្ឃក្នុងវត្តរៀបចំកម្មវិធីនេះ ជា ច្រើនថ្ងៃមកហើយ ការតុបតែង និងការច្នៃប្រឌិតពិតជាទាក់ទាញ លទ្ធផលទាំងនេះ ពិតជាកើតចេញពីសេចក្តីគោរព ស្រឡាញ់ និងពេញចិត្ត ព្រមទាំងថែរក្សានូវប្រពៃណី ដ៏ល្អរបស់ដូនតាខ្មែរ សូមអង្គពិធីអបអរសាទរពាំនាំការសួរសុខទុក និងតម្លៃនៃសន្តិភាព និងសូមពាំនាំនូវបណ្តាំផ្ញើសួរសុខទុក្ខពី ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង ដែលឯកឧត្តម តែងតែយកចិត្តទុកដាក់ និងគិតគូរពីសុខទុក្ខរបស់លោកតា លោកយាយ អ៊ំ ពូមីង ពុកម៉ែ បងប្អូនទាំងនិងក្មួយៗទាំងអស់គ្នា ពិតណាស់ថា បើគ្មានសន្តិភាព គ្មានស្ថេរភាពនយោបាយនោះទេ យើងពិតជាពុំមានឱកាសសម្រាប់ចូលរួមជួបជុំគ្នា និងលេងល្បែងប្រជាប្រិយដូចថ្ងៃនេះទេ។ ទាំងនេះជាគុណតម្លៃដែលយើងទាំងអស់គ្នាចងចាំមិនភ្លេច និងរួមគ្នាថែរក្សាឱ្យបានគង់វង្ស។ ទន្ទឹមនឹងនោះផ្អែកតាមការជូនដំណឹងរបស់ក្រសួងមានសមត្ថកិច្ច អាកាសធាតុមានការប្រែប្រួលខ្លាំង កម្ដៅកើនឡើង ថែសុខភាព ពិសាទឹកឱ្យបានច្រើន អនុវត្តតាមការណែនាំរបស់ក្រសួង ចូលរួមលេងល្បែងប្រជាប្រិយឱ្យបានសប្បាយ និងច្រើនកុះករផងដែរ៕
អត្ថបទ៖ រដ្ឋា