ប្រភពមួយដែលដឹងពីស្ថានភាពនេះ បាននិយាយថា បេសកជនរបស់សហរដ្ឋអាមេរិកទទួលបន្ទុកកិច្ចការមជ្ឈិមបូព៌ា បានអំពាវនាវដល់រដ្ឋមន្ត្រីការបរទេសអារ៉ាប៊ីសាអ៊ូឌីត អារ៉ាប់រួម កាតា និងអ៊ីរ៉ាក់ ដោយសុំឲ្យពួកគេផ្ញើសារទៅកាន់ប្រទេសអ៊ីរ៉ង់ ដោយជំរុញឲ្យប្រទេសនេះ កាត់បន្ថយភាពតានតឹងជាមួយអ៊ីស្រាអែល បន្ទាប់ពីមានការសង្ស័យថា អ៊ីស្រាអែល បានវាយប្រហារតាមអាកាសលើស្ថានទូតអ៊ីរ៉ង់ នៅក្នុងប្រទេស  ស៊ីរី។

លោក Brett McGurk បានស្នើឲ្យមន្ត្រីទាំងអស់ទាក់ទងរដ្ឋមន្ត្រីការបរទេសអ៊ីរ៉ង់ បញ្ជូនសារមួយថា អ៊ីរ៉ង់ គួរតែបន្ធូរបន្ថយភាពតានតឹងជាមួយអ៊ីស្រាអែល នេះបើតាមប្រភពដែលបាននិយាយក្នុងលក្ខខណ្ឌមិនបញ្ចេញឈ្មោះ។

ក្រសួងការបរទេសអ៊ីរ៉ង់ បាននិយាយកាលពីថ្ងៃពុធថា រដ្ឋមន្ត្រីការបរទេសនៃប្រទេសអារ៉ាប៊ីសាអ៊ូឌីត អារ៉ាប់រួម កាតា និងអ៊ីរ៉ាក់ បានសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់ និងពិភាក្សាអំពីភាពតានតឹងក្នុងតំបន់។

សេតវិមាន បានបដិសេធមិនធ្វើអត្ថាធិប្បាយទេ។

ការសន្ទនាតាមទូរស័ព្ទរបស់លោក McGurk ត្រូវបានរាយការណ៍ជាលើកដំបូង ដោយសារព័ត៌មាន   Axios។

មេដឹកនាំកំពូលរបស់អ៊ីរ៉ង់ លោកអាយ៉ាតូយ៉ា អាលីខាមីណេ( Ayatollah Ali Khamenei) បាននិយាយថា អ៊ីស្រាអែល «ត្រូវតែទទួលទណ្ឌកម្ម ហើយវានឹងត្រូវទទួលខុសត្រូវសម្រាប់ការវាយប្រហារ នៅទីក្រុង ដាម៉ាសដែលបានសម្លាប់សមាជិកកងឆ្មាំបដិវត្តន៍អ៊ីរ៉ង់ចំនួន ៧នាក់។