យោងតាមអគ្គនាយកដ្ឋានឱសថបង្ការក្រោមក្រសួងសុខាភិបាល បាននិយាយឲ្យដឹង កាលពីថ្ងៃពុធថា ប្រទេសវៀតណាម បានរាយការណ៍ករណីជំងឺពងបែកមាត់ ដៃ ជើង ចំនួន ១០.១៩៦ករណី ចាប់តាំងពីដើមឆ្នាំនេះ ដែលកើនឡើង ២,៣ដង បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

នាយកដ្ឋាន បាននិយាយថា ភាគច្រើននៃករណី ត្រូវបានរាយការណ៍នៅក្នុងតំបន់ភាគខាងត្បូងដែលមានជាង ៧.៥០០ករណី។

ជំងឺនេះ ត្រូវបានគេរាយការណ៍ ភាគច្រើននៅសាលាមត្តេយ្យ ដែលកុមារ៩០ភាគរយ មានអាយុក្រោម ៥ឆ្នាំ បានឆ្លង ប៉ុន្តែពុំមានអ្នកស្លាប់ត្រូវបានរាយការណ៍នោះទេ រហូតមកដល់ពេលនេះ។

លោក ហ័ង មីញឌុក (Hoang Minh Duc) ប្រធាននាយកដ្ឋានបាននិយាយថា បច្ចុប្បន្ននេះ ពុំទាន់មានវ៉ាក់សាំងសម្រាប់ការពារជំងឺពងបែកមាត់ ដៃ ជើង ដែលអាចប្រើប្រាស់បាននៅឡើយទេ។

គំរូបឋមនៃការចម្លងជំងឺនេះ គឺតាមរយៈបំពង់រំលាយអាហារ ដែលធ្វើឲ្យគ្រឹះស្ថានអប់រំថ្នាក់មត្តេយ្យសិក្សាក្លាយជាបរិស្ថានប្រឈមខ្ពស់សម្រាប់ការឆ្លងជំងឺនេះ។