លោក Narendra Modi តែងតែនិយាយថា លោកចូលចិត្តគិតធំ សុបិនធំ និងធ្វើធំ។ ដោយធ្លាប់ជាក្មេងប្រុសលក់តែ នៅស្ថានីយ៍រថភ្លើង ខណៈដែលម្តាយរបស់លោកស៊ីឈ្នួលលាងចាន ដើម្បីបានកម្រៃយកមកទិញអាហារចម្អែតក្រពះនោះ បុរសម្នាក់នេះដែលមើលទៅទំនងជាជនជាតិឥណ្ឌាទី២ ដែលឈ្នះការបោះឆ្នោតជាតិ ៣លើកជាប់ៗគ្នានោះ បានធ្វើដំណើរទៅឆ្ងាយពីការចាប់ផ្តើមដ៏តូចទាបរបស់លោក ហើយរូបលោកនៅតែគិតធំដដែល។

ការស្ទង់មតិនៅមុនការបោះឆ្នោតដែលត្រូវចាប់ផ្តើមនៅថ្ងៃទី១៩ ខែមេសា បង្ហាញលទ្ធផលថា លោកនឹងស្មើជាមួយកំណត់ត្រាឈ្នះ ៣អាណត្តិជាប់គ្នារបស់នាយករដ្ឋមន្ត្រីទី១ របស់ប្រទេសឥណ្ឌា គឺលោក Jawaharlal Nehru (ចាវ៉ាហារឡាល់ នេហ៍រុ) ជាបុគ្គលទទួលបានការអប់រំ និងអ្នកមានទ្រព្យសម្បត្តិពីលោកខាងលិច ដែលលេចធ្លោដោយឲ្យឈ្មោះការទទួលបានឯករាជ្យរបស់ឥណ្ឌាក្នុងឆ្នាំ១៩៤៧ ថា ជា «ការសម្រេចជោគវាសនា»។

ប្រសិនបើលោកទទួលបានជ័យជម្នះ នោះអាចជាអាណត្តិចុងក្រោយរបស់លោក Modi វ័យ ៧៣ឆ្នាំ ហើយលោកចង់ពង្រឹងកេរ្តិ៍ដំណែលដោយការបង្កើតផ្លូវឲ្យប្រទេសឥណ្ឌាធ្វើដំណើរឆ្ពោះទៅរកការលុបបំបាត់ភាពក្រីក្រ និងក្លាយជាប្រទេសអភិវឌ្ឍន៍ពេញលេញ នៅឆ្នាំ២០៤៧ ដែលជាឆ្នាំគម្រប់ខួបទី១០០ នៃការទទួលបានឯករាជ្យពីអាណានិគមអង់គ្លេស។

លោកបានកំណត់គោលដៅបណ្តោះអាសន្ននៃការបង្កើនទំហំសេដ្ឋកិច្ចប្រហែល ៨ដងដល់ ២៩សែនកោដិដុល្លារ នៅពេលនោះ ហើយប្រាក់ចំណូលសម្រាប់មនុស្សម្នាក់ៗប្រហែល ៧ដង ពោលគឺឡើងដល់ជិត ១៨.០០០ដុល្លារ ក្រៅពីការធានាបានកៅអីអចិន្ត្រៃយ៍នៅឯក្រុមប្រឹក្សាសន្តិសុខអង្គការសហប្រជាជាតិ។

លោក Modi និងគណបក្ស Bharatiya Janata Party (BJP) របស់លោក បានបញ្ចុះបញ្ចូលជាប់រហូតចំពោះសហគមន៍ដែលកាន់សាសនាហិណ្ឌូភាគច្រើន ក្នុងនោះរួមទាំងដោយការដឹកនាំកសាងប្រាសាទ ឬវត្តហិណ្ឌូនៅលើទីតាំងរបស់វិហារអ៊ីស្លាមដែលត្រូវបានបំផ្លាញ ដែលការធ្វើបែបនេះបានបញ្ឆេះឲ្យមានរលកជម្លោះខាងសាសនា។ ការស្ទង់មតិសម្រាប់ការគាំទ្ររូបលោក គឺ ៧៥ភាគរយ ដែលជាកម្រិតខ្ពស់បំផុតក្នុងចំណោមមេដឹកនាំពិភពលោកទាំង ២៥រូប ដែលត្រូវបានតាមដានដោយក្រុមហ៊ុនស៊ើបការណ៍ទិន្នន័យអាមេរិក Morning Consult៕