ប្រព័ន្ធផ្សព្វផ្សាយរដ្ឋ និងមន្ត្រីតុលាការរបស់ប្រទេសលីបង់ បាននិយាយថា បុរសជនជាតិលីបង់ម្នាក់ដែលត្រូវបានទណ្ឌកម្មដោយសហរដ្ឋអាមេរិកជុំវិញការចោទប្រកាន់ថា គាត់មានទំនាក់ទំនងជាមួយនឹងក្រុមហាម៉ាសប៉ាឡេស្ទីន ត្រូវបានគេរកឃើញថា បានស្លាប់កាលពីថ្ងៃពុធ បន្ទាប់ពីគាត់បានបាត់ខ្លួនអស់រយៈពេលមួយសប្តាហ៍។

លោក Mohammad Srour មានវ័យ៥៧ឆ្នាំ ត្រូវបានដាក់ទណ្ឌកម្មដោយសហរដ្ឋអាមេរិក នៅក្នុងខែសីហា ២០១៩សម្រាប់ការផ្តល់ «ហិរញ្ញវត្ថុ សម្ភារៈ ការគាំទ្រផ្នែកបច្ចេកវិទ្យា ហិរញ្ញវត្ថុ ឬសេវាកម្មផ្សេងទៀត» ដល់ក្រុមហាម៉ាស និងការទំនាក់ទំនងរបស់គាត់ជាមួយក្រុមហេសបូឡា។ គាត់ត្រូវបានគេចោទប្រកាន់ថា បានផ្ទេរប្រាក់រាប់សិបលានដុល្លារជារៀងរាល់ឆ្នាំពីកងឆ្មាំបដិវត្តន៍ឥស្លាមរបស់អ៊ីរ៉ង់ ទៅឲ្យកង ទ័ពរបស់ហាម៉ាស គឺកងពលតូច Qassam ដែលបច្ចុប្បន្ន កំពុងធ្វើសង្រ្គាមជាមួយយោធាអ៊ីស្រាអែល នៅតំបន់ហ្កាហ្សា។

មន្ត្រីតុលាការលីបង់និយាយថា លោក Srour បានធ្វើការឲ្យផ្នែកហិរញ្ញវត្ថុរបស់ក្រុមហេសបូឡា។

មន្ត្រីជាន់ខ្ពស់មួយរូបនៃក្រសួងរតនាគារអាមេរិក បានទៅធ្វើទស្សនកិច្ចនៅលីបង់ ក្នុងខែមីនា ហើយបានជំរុញអាជ្ញាធរឲ្យរារាំងមូលនិធិដែលត្រូវបានបញ្ជូនទៅកាន់ក្រុមហាម៉ាសឆ្លងកាត់ប្រទេសមេឌីទែរ៉ាណេ។

ក្នុងសេចក្តីថ្លែងការណ៍តាមទូរទស្សន៍ សាច់ញាតិរបស់លោក Srour បាននិយាយថា រាល់ប្រតិបត្តិការហិរញ្ញវត្ថុរបស់គាត់ មានតម្លាភាព ហើយគាត់គ្រាន់ តែធ្វើការប្តូរប្រាក់ប៉ុណ្ណោះ។ ពួកគេបានជំរុញឲ្យក្រុមភ្នាក់ងារសន្តិសុខស្វែងរកចាប់ខ្លួនជនល្មើស ឲ្យបានឆាប់រហ័ស។