កាលពីថ្ងៃពុធម្សិលមិញ ប្រធានាធិបតីហ្វាំងឡង់លោក Alexander Stubb បានជួបជាមួយអគ្គលេខាធិការអង្គការណាតូលោក Jens Stoltenberg នៅទីស្នាក់ការកណ្តាលរបស់អង្គការមួយនេះ ស្ថិតក្នុងទីក្រុងព្រុចសែល ប្រទេសបែលហ្ស៊ិក ជាទីដែលពួកគេបានពិភាក្សាលើជំនួយយោធាដល់អ៊ុយក្រែន ជាពិសេសតម្រូវការបន្ទាន់សម្រាប់ប្រព័ន្ធការពារដែនអាកាស ។

លោក Stoltenberg បានព្រមានថា ការពន្យាពេលកាចែកចាយប្រព័ន្ធការពារដែនអាកាសដល់អ៊ុយក្រែន នឹងធ្វើឲ្យមីស៊ីលរុស្ស៊ី វាយប្រហារចំគោលដៅកាន់តែច្រើនជាងមុន ។

លោក Stoltenberg បានធ្វើការសង្កត់ធ្ងន់ពីសារសំខាន់នៃជំនួយអាចទុកចិត្តបាន និងអាចព្យាករណ៍បាន សម្រាប់អ៊ុយក្រែន ជាការប្រឈមនឹងការវាយលុករបស់រុស្ស៊ី ។

លោកបានទទួលស្គាល់កិច្ចខិតខំប្រឹងប្រែងរបស់សម្ព័ន្ធមិត្តណាតូ ក្នុងការផ្តល់ប្រព័ន្ធការពារដែនអាកាសរយៈចម្ងាយឆ្ងាយ និងមីស៊ីលរយៈចម្ងាយឆ្ងាយដល់អ៊ុយក្រែន ។

លោក Stoltenberg បានបញ្ជាក់ឡើងវិញផងដែរពីសិទ្ធិស្វ័យការពាររបស់អ៊ុយក្រែន និងការប្តេជ្ញាចិត្តរបស់អង្គការណាតូ ក្នុងការគាំទ្រដល់សិទ្ធិមួយនេះ ដោយមិនចាំបាច់ក្លាយជាភាគីនៃជម្លោះ ។

ខណៈពេលនោះដែរ ក្រុមមន្ត្រីអ៊ុយក្រែននិយាយថា កងកម្លាំងរុស្ស៊ីបានបើកការវាយប្រហារយ៉ាងខ្លាំងក្លាកាលពីថ្ងៃពុធលើគោលដៅជា ភាគខាងត្បូង និងភាគខាងជើងអ៊ុយក្រែន នៅតំបន់ Kharkov និងទីក្រុងកំពង់ផែ Odesa ដោយបានសម្លាប់មនុស្ស ៧នាក់ និងជាច្រើននាក់ទៀតរងរបួស ។ 

អភិបាលក្រុង Odesa លោក Oleh Kiper បាននិយាយថា ការវាយប្រហារដោយមីស៊ីលរបស់រុស្ស៊ីកាលពីល្ងាចថ្ងៃពុធ បានសម្លាប់មនុស្ស ៤ នាក់ រួមទាំងក្មេងស្រីអាយុ ១០ ឆ្នាំម្នាក់ផង ហើយមនុស្ស ១៤ នាក់ផ្សេងទៀត បានរងរបួស ៕