កុមារជាង ២៤៣លាននាក់នៅទូទាំងតំបន់អាស៊ីបូព៌ា និងប៉ាស៊ីហ្វិក ប្រឈមនឹងហានិភ័យនៃការមានជំងឺ និងការបាត់បង់ជីវិតទាក់ទងនឹងកម្ដៅ ខណៈដែលតំបន់នេះត្រៀមជួបប្រទះរដូវក្តៅ ដែលមានកម្ដៅក្ដៅខ្លាំងបំផុត ក្នុងប៉ុន្មានខែខាងមុខនេះ។ នេះបើយោងតាមទីភ្នាក់ងាររបស់អង្គការសហប្រជាជាតិទទួលបន្ទុកសុខុមាលភាពរបស់កុមារ។

ការព្រមានអំពីរលកកម្ដៅកាន់តែខ្លាំង និងញឹកញាប់ក្នុងរដូវក្តៅនេះ គឺជាការព្រួយបារម្ភជាពិសេស នៅក្នុងតំបន់ ដោយសារកម្រិតសំណើមខ្ពស់ធ្វើឲ្យរាងកាយកាន់តែពិបាកត្រជាក់តាមធម្មជាតិ។ ហើយបើយោងតាមមូលនិធិកុមាររបស់អង្គការសហប្រជាជាតិ (Unicef) បានឲ្យដឹងថា ដោយសារកុមារមិនអាចគ្រប់គ្រងសីតុណ្ហភាពរាងកាយរបស់ពួកគេបានល្អជាងមនុស្សពេញវ័យ ពួកគេងាយរងគ្រោះ ក្នុងការមានជំងឺទាក់ទងនឹងកម្ដៅ ដូចជាជំងឺផ្លូវដង្ហើមរ៉ាំរ៉ៃ ជំងឺហឺត និងជំងឺសរសៃឈាមបេះដូងជាដើម។

នៅក្នុងសេចក្តីថ្លែងការណ៍មួយ នៅថ្ងៃព្រហស្បតិ៍ (ទី១១ ខែមេសា) នេះ លោកស្រី Debora Comini នាយិកាការិយាល័យតំបន់របស់ Unicef ប្រចាំតំបន់អាស៊ីបូព៌ា និងប៉ាស៊ីហ្វិក បាននិយាយថា៖ «កុមារងាយរងគ្រោះជាងមនុស្សពេញវ័យពីផលប៉ះពាល់នៃបម្រែបម្រួលអាកាសធាតុនោះ ហើយកម្ដៅក្ដៅខ្លាំងពេក គឺជាការគំរាមកំហែងដ៍ធ្ងន់ធ្ងរបំផុតដល់ពួកគេ។ យើងត្រូវតែមានការប្រុងប្រយ័ត្នខ្ពស់ក្នុងរដូវក្តៅនេះ ដើម្បីការពារកុមារ និងសហគមន៍ដែលងាយរងគ្រោះពីរលកកម្ដៅកាន់តែអាក្រក់ទៅៗនេះ និងការប្រែប្រួលអាកាសធាតុផ្សេងទៀត»។

ការព្រមានរបស់អង្គការ Unicef នេះ កើតឡើងចំពេលមានរបាយការណ៍ដែលថា ខែមីនា គឺជាខែឡើងកម្ដៅខ្ពស់បំផុត ១០ខែជាប់គ្នា ដោយប្រជាជននៅទូទាំងអឌ្ឍគោលខាងជើង និងខាងត្បូងភាគច្រើន ជួបប្រទះនឹងសីតុណ្ហភាពលើសកម្រិតកំណត់គោលដៅអាកាសធាតុ៕