វៀតណាម៖ កងពលតូច​ស្ថិត​ក្រោម​បញ្ជា​ការដ្ឋាន​ទីក្រុង​ហូជីមិញ និង​កងកម្លាំង​ប្រដាប់​អាវុធ​នៅ​តាម​បណ្ដា​ស្រុក​ជាច្រើន ​និង​ទីក្រុង Thu Duc បាន​ចាប់ផ្ដើម​ធ្វើ​អនាម័យ​ទូទាំង​ក្រុង​រយៈពេល ៧​ថ្ងៃដោយមាន​ការចូលរួម​ពី​បុគ្គលិក​យោធា​ជិត ២.០០០​នាក់​។

តាម​ការ​គ្រោង​ទុក​ក្រុម​ចំនួន​២​ ដែល​មាន​យានយន្ត​ពិសេស​ចំនួន ១៦​គ្រឿង​នឹង​ធ្វើ​ការ​បោសសំអាត​ស្រុក​ចំនួន ៤ ជា​រៀងរាល់ថ្ងៃ​។ ការ​សម្អាត​ និង​ការ​បាញ់​ថ្នាំ​សម្លាប់​វីរុស​ត្រូវ​បាន​អនុវត្ត​នៅ​ទីក្រុង Thu Duc និង​ស្រុក Binh Chanh ក្នុង​ថ្ងៃ​ដំបូង​នៃ​យុទ្ធនាការ​។​ សារព័ត៌មាន​រាយការណ៍​ថា ទីបញ្ជាការ​ទីក្រុង​ហូជីមិញ​បាន​ស្នើ​ដល់​អង្គភាព​មាន​សមត្ថកិច្ច​ និង​ទីបញ្ជាការ​យោធា ​និង​អាជ្ញាធរ​មូលដ្ឋាន​ស្រុក​ និង​ទីក្រុង Thu Duc ដើម្បី​គេច​ចេញ​ពី​ស្ថានភាព​វីរុស​រាតត្បាត​ និង​ធានា​សន្តិសុខ ​និង​សុវត្ថិភាព​ចរាចរណ៍​ក្នុង​ពេល​យុទ្ធនាការ​។

​កម្មវិធី​អនាម័យ​ត្រូវ​បាន​គេ​រំពឹង​ថានឹង​សម្អាត​បរិស្ថាន និង​កាត់បន្ថយ​វិបត្តិ​វីរុស​ឆ្លង​ដែល​កំពុង​កើត​មាន​នៅ​ក្នុង​ទីក្រុង​។ សម្រាប់​យុទ្ធនា​ការ​ចាក់​វ៉ាក់សាំង​បង្ការ​វីរុស Covid-19 លើក​ទី​៥ របស់​ខ្លួន ទីក្រុង​ហូជីមិញ​មាន​គោលបំណង​ផ្តល់​វ៉ាក់សាំង​ចំនួន ៩៣០,០០០​ដូ​ស​នៅ​ទូទាំង ២១​ស្រុក ​និង​ទីក្រុង Thu Duc​។​ ​ប្រទេស​វៀតណាម​បាន​កត់ត្រា​អ្នក​ឆ្លង​ថ្មី​នៃ​វីរុស​ Covid-19 ចំនួន​ ៣.៩៩១​នាក់​នៅ​ព្រឹក​ថ្ងៃ​សៅរ៍​នេះ ដែល​នាំ​ឲ្យ​ចំនួន​អ្នក​ឆ្លង​សរុប​នៅ​ប្រទេស​នេះ​កើន​ឡើង​ដល់ ៨៦.៩៥៧​នាក់ និង​អ្នក​ស្លាប់​សរុប​ចំនួន ​៣៧០​នាក់​៕

អត្ថបទ៖ ប៊ុនថន