សហភាពអឺរ៉ុប បានជម្រះឧបសគ្គធំមួយឆ្ពោះទៅរកការអនុម័តគោលនយោបាយអន្តោប្រវេសន៍ និងសិទ្ធិជ្រកកោនដ៏សំខាន់មួយដែលត្រូវបានរិះគន់ដោយសកម្មជនសិទ្ធិមនុស្ស និងសមាជិកសភាមួយចំនួនចំពោះការធ្វើឲ្យមានបញ្ហាដែលមានស្រាប់ កាន់តែធ្ងន់ធ្ងរឡើង។

បន្ទាប់ពីការជជែកពិភាក្សាគ្នាយ៉ាងស្វិតស្វាញ សភាអ៊ឺរ៉ុបកាលពីថ្ងៃពុធ បានបោះឆ្នោតគាំទ្រប្រព័ន្ធរួមមួយដើម្បីគ្រប់គ្រងការមកដល់នៃប្លុកដែលនឹងពន្លឿនដំណើរការសិទ្ធិជ្រកកោន ការវិលត្រឡប់ និងព្រំដែន   ខណៈពេលដែលធានានូវការទទួលខុសត្រូវរួមគ្នាក្នុងចំណោមរដ្ឋជាសមាជិក ក្នុងការជួយអ្នកដែលជួបប្រទះលំហូរចូលដ៏សំខាន់នៃជនអន្តោប្រវេសន៍។ សហភាពអឺរ៉ុប ក៏នឹងបង្កើតច្បាប់ឯកសណ្ឋាន ដើម្បីកំណត់អត្តសញ្ញាណជនមិនមែនសហភាពអឺរ៉ុប នៅពេលមកដល់។

ប្រធានគណៈកម្មការអឺរ៉ុប លោកស្រី Ursula von der Leyen បាននិយាយនៅក្នុងសន្និសីទសារព័ត៌មានមួយថា៖«កិច្ចព្រមព្រៀងនេះ បានធ្វើឲ្យមានតុល្យភាពត្រឹមត្រូវរវាងការគ្រប់គ្រងតឹងរ៉ឹងប្រឆាំងនឹងការរំលោភបំពាននៃប្រព័ន្ធ និងការយកចិត្តទុកដាក់ចំពោះអ្នកដែលងាយរងគ្រោះបំផុត»។

ការបោះឆ្នោតនេះ ធ្វើឡើង បន្ទាប់ពីកិច្ចព្រមព្រៀងនយោបាយរវាងសមាជិកសភា និងរដ្ឋជាសមាជិកសហភាពអឺរ៉ុបលើកិច្ចព្រមព្រៀងថ្មី ដែលមានគោលបំណងដោះស្រាយគុណវិបត្តិដែលមានស្រាប់ ដែលបាន    ផ្តល់ការគាំទ្រដល់គណបក្សស្តាំនិយមជ្រុលដែលប្រឆាំងនឹងជនអន្តោប្រវេសន៍ នៅមុនការបោះឆ្នោតនៅទូទាំងទ្វីបអឺរ៉ុប ក្នុងខែមិថុនា។ ការធ្វើទេសន្តរប្រវេសន៍ គឺជាបញ្ហាដ៏ចម្រោងចម្រាសនៅក្នុងទ្វីបអឺរ៉ុប ដែលប្រទេសមួយចំនួនដូចជាក្រិក អេស្ប៉ាញ និងអ៊ីតាលី ត្រូវបានគ្របដណ្ដប់ដោយការឆ្លងពីប្រទេសទីបី ជាពិសេសពីមជ្ឈិមបូព៌ា និងអាហ្រ្វិក ដែលគេចចេញពីអំពើហិង្សា និងភាពក្រីក្រ។

អធិការបតីអាល្លឺម៉ង់លោក អូឡាហ្វ សូល ( Olaf Scholz) បានសរសើរលទ្ធផលនេះថា ជាជំហានដ៏សំខាន់សម្រាប់សាមគ្គីភាពរបស់អឺរ៉ុប។