មហាសេដ្ឋីអចលនទ្រព្យវៀតណាមម្នាក់ត្រូវបានកាត់ទោសប្រហារជីវិត នៅថ្ងៃព្រហស្បតិ៍ (ទី១១ ខែមេសា) ក្នុងសំណុំរឿងពុករលួយដ៏ធំបំផុតមួយក្នុងប្រវត្តិសាស្ត្រ ដោយការខូចខាតត្រូវបានប៉ាន់ប្រមាណថា មានចំនួន ២៧ពាន់លានដុល្លារ។

គណៈវិនិច្ឆ័យជ្រើសរើសពិសេសចំនួន ៣រូប និងចៅក្រម ២រូប បានច្រានចោលរាល់ទឡ្ហីករណ៍របស់មេធាវីការពារក្តីរបស់លោកស្រី Truong My Lan ដែលជាប្រធានក្រុមហ៊ុនអភិវឌ្ឍន៍ដ៏ធំ គឺក្រុមហ៊ុន Van Thinh Phat ដែលត្រូវបានរកឃើញថា មានទោសពីបទឆបោកប្រាក់ពីធនាគារពាណិជ្ជ Saigon (SCB) ក្នុងរយៈពេលមួយទសវត្សរ៍។

ការប្រកាសសាលក្រម នៅឯការកាត់ក្តី ក្នុងមជ្ឈមណ្ឌលពាណិជ្ជកម្មភាគខាងត្បូងទីក្រុងហូជីមិញ បានរៀបរាប់ថា៖ «សកម្មភាពរបស់ចុងចោទ បានបំផ្លាញការជឿទុកចិត្តរបស់ប្រជាជនលើការដឹកនាំរបស់បក្ស និងរដ្ឋ (កុម្មុយនីស្ត)»។

លោកស្រី Lan បានបដិសេធរាល់ការចោទប្រកាន់ ហើយបានបន្ទោសអ្នកក្រោមបង្គាប់របស់លោកស្រី។ បន្ទាប់ពីការកាត់ក្តីរយៈពេល ៦សប្តាហ៍ នៅក្នុងមជ្ឈមណ្ឌលធុរកិច្ចទីក្រុងហូជីមិញ មនុស្ស ៨៥នាក់ផ្សេងទៀត ក៏ប្រឈមមុខនឹងសាលក្រម និងការកាត់ទោសលើបទចោទប្រកាន់ជាច្រើន រាប់ចាប់ពីការសូកប៉ាន់ និងការរំលោភអំណាច រហូតដល់ការលួចដកប្រាក់ និងការបំពានច្បាប់ធនាគារ។

លោកស្រី Lan បានកិបកេងប្រាក់ចំនួន ១២,៥ពាន់លានដុល្លារ ប៉ុន្តែរដ្ឋអាជ្ញាបាននិយាយនៅថ្ងៃទី១១ ខែមេសានេះ ការខូចខាតសរុបដែលបណ្តាលមកពីការឆបោក ឥឡូវនេះ មានចំនួន ២៧ពាន់លានដុល្លារ ដែលជាតួលេខស្មើនឹង ៦ភាគរយនៃ GDP (ផលិតផលក្នុងស្រុកសរុប) ឆ្នាំ២០២៣ របស់ប្រទេស។ 

គួរបញ្ជាក់ថា ការកាត់ទោសប្រហារជីវិត គឺជាការផ្តន្ទាទោសដ៏ធ្ងន់ធ្ងរមិនធម្មតាមួយ នៅក្នុងសំណុំរឿងបែបនេះ៕