ក្រសួងមុខងាសាធារណៈបានកំណត់កាលបរិច្ឆេទសម្រាប់ការប្រឡងប្រជែងជ្រើសរើសគ្រូបង្រៀន​អនុវិទ្យាល័យរយៈពេល៤ថ្ងៃ និង៣មណ្ឌលប្រឡង។

ក្រសួងមុខងារសាធារណ: បានរៀបចំកិច្ចប្រជុំពិភាក្សាលើការពិនិត្យវឌ្ឍនភាព​ការងារ​នៃ​ដំណើរ​ការ​ការ​រៀបចំ​ការ​ប្រឡង​ប្រជែង​ជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យ។ កិច្ច​ប្រជុំ​នេះ ​ធ្វើឡើងនៅរសៀលថ្ងៃទី ១១ ខែមេសា ឆ្នាំ ២០២៤ ដោយដឹកនាំដោយឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ។ ក្នុងកិច្ចប្រជុំនេះ ក្រុមការងារ​បាន​រាយការណ៍​អំពី​ចំនួនបេក្ខជនដែលត្រូវបានអនុញ្ញាតចំនួនរហូតដល់ ៣៣,៣១៤នាក់។

តាមរយៈកិច្ចប្រជុំនេះដែរ គណៈកម្មការបានកំណត់ថា ការប្រឡងប្រជែង​ជ្រើស​រើសគ្រូ​បង្រៀន​អនុវិទ្យាល័យ​ដំណាក់កាលទី១ សម្រាប់ជ្រើសសម្រាំង ត្រូវប្រើប្រាស់រយៈពេល ៤ថ្ងៃ និង​មណ្ឌល​ប្រឡង​ចំនួន​៣ ដើម្បីសម្របខ្លួនទៅតាមបេក្ខជនដែលមានចំនួនច្រើន។

 ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានគណៈកម្មការការប្រឡងប្រជែង បានលើកឡើងថា “ចំនួនដាក់ពាក្យដ៏ច្រើនលើសលប់ បានឆ្លុះ​បញ្ចាំង​ពី​ការ​ជឿ​ទុក​ចិត្ត​មក​លើ​ប្រព័ន្ធ​នៃ​ការ​ប្រឡង​ប្រជែង​ជ្រើស​រើសមន្ត្រីរាជការស៊ីវិល តាមនិយាមដែលបានដាក់ចេញ”។

 ឯកឧត្តម​ឧបនាយករដ្ឋមន្ត្រី ក៏បានបន្ថែមផងដែរថា លទ្ធផលនៃការជឿទុកចិត្តនេះ ឆ្លុះបញ្ចាំង​ពី​ការ​ខិត​ខំ​ប្រឹងប្រែង និងការលះបង់របស់ថ្នាក់ដឹកនាំ ជាពិសេសសមាជិក សមាជិកា នៅក្នុង​គណៈ​កម្មការ និងអនុគណៈកម្មការរៀបចំការប្រឡង។ តាមរយៈ របាយការណ៍ បានឆ្លុះ​បញ្ចាំង​ឱ្យ​ឃើញ​ពី​ទំហំ​ការងារ ការគិតគូរ គ្រប់ជ្រុងជ្រោយ និងគ្រប់ទិដ្ឋភាព ទៅលើដំណើរ​ការ​រៀបចំ​ការ​ប្រឡង​ជា​រួម ទាំងការគិតគូរ លើការងារបច្ចេកទេស និងការគិតគូរផ្សេងៗ ជាពិសេស​លើ​ចំនួន​បេក្ខជន​ដាក់​ពាក្យ​ប្រឡង ការរៀបចំដំណើរការប្រឡងតាមថ្ងៃ តាមមណ្ឌល តាមមុខវិជ្ជា និងតាមទីតាំង​ភូមិ​សាស្ត្រ ​ខេត្តរបស់បេក្ខជន។ ទោះបីការងារនេះ មានទំហំធំ និងមមាញឹក ប៉ុន្តែក្រុមការងារ ពិតជា​បាន​រៀប​ចំ និងត្រៀម ខ្លួនរួចរាល់សម្រាប់ការប្រឡងខាងមុខ។

 សូមជម្រាបថា គណៈកម្មការរៀបចំការប្រឡងប្រជែង នឹងជូនដំណឹង​លម្អិត​ជុំវិ​ញ​ការ​ប្រឡង​ប្រជែង​ក្នុង​ពេលឆាប់ៗខាងមុខនេះ និងសូមបន្តតាមដានការផ្សព្វផ្សាយ និងសេចក្តី​ជូន​ដំណឹង​នានា ពីបណ្តាញផ្សព្វផ្សាយផ្លូវការរបស់ក្រសួងមុខងារសាធារណៈ៕