កម្មករ-កម្មការិនី ជាបណ្តើរៗហើយនៅព្រឹកថ្ងៃទី១២ ខែមេសានេះ បាននាំគ្នា​ចាក​ចេញ​ពី​រាជ​ធានី​ភ្នំពេញ ដោយប្រើមធ្យោបាយផ្សេងៗ កម្មករខ្លះធ្វើដំណើរដោយរថយន្តក្រុងដោយឥតគិតថ្លៃ ខ្លះ​ជិះ​រថយន្ត​ឈ្នួល និងខ្លះទៀតធ្វើដំណើរដោយម៉ូតូ ដើម្បីទៅជួបជុំគ្រួសារ សាច់ញាតិ​នៅ​ស្រុក​កំណើត​រៀងៗខ្លួន ដើម្បីប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ នៅយប់ថ្ងៃស្អែកនេះ។

អ្នកស្រី ខឹម យី មានស្រុកកំណើតនៅខេត្តព្រះសីហនុ ជាកម្មការិនីកាត់ដេរនៅរាជធានីភ្នំពេញ បាន​ឲ្យ​ព័ត៌មាន ប៊ីធីវី ដឹងថា នេះជាលើកទី១ ដែលបានប្រើប្រាស់​សេវា​រថយន្ត​ក្រុង​ដោយ​មិន​គិត​ថ្លៃ ​និងមានអារម្មណ៍ថា រំភើបសប្បាយ​រីករាយ​ដែល​រដ្ឋាភិបាល​ផ្តល់​ជូន​ដោយ​មិន​តម្រូវ​ឲ្យ​បង់​ថ្លៃ​អ្វី​ទាំង​អស់ ថែមទាំងមានការផ្តល់ជូនបន្ថែមនូវភេសជ្ជះផងដែរ។ អ្នកស្រី និយាយទៀតថា ការ​ជិះ​រថយន្ត​ក្រុង គឺមានភាពងាយស្រួល ត្រជាក់ និងមានសុវត្ថិភាពថែមទៀត។ ជាពិសេស អាចកាត់​បន្ថយ​ការ​ចំណាយបានច្រើន ខណៈកាលមិនទាន់បានប្រើប្រាស់រថយន្តសាធារណៈនេះ អ្នកស្រី និង​គ្រួសារ​ត្រូវចំណាយថវិកាយ៉ាងហោចណាស់ ២០ម៉ឺនរៀល ដើម្បីធ្វើ​ដំណើរ​ទៅ​ស្រុក​កំណើត​នៅ​ខេត្ត​ព្រះសីហនុនេះ។

កម្មករ កម្មការនី ក៏ដូចជាប្រជាពលរដ្ឋដទៃផ្សេងទៀត ដែលជិះ​រថយន្ត​ក្រុង​ទៅកា​ន់​គោល​ដៅ​ផ្សេង​ៗគ្នាក្នុ​ងថ្ងៃនេះ បានលើកឡើងស្រដៀងគ្នា ពិតជាអរគុណដល់រាជរដ្ឋាភិបាល ដែលបាន​គិតគូរ​សុខទុក្ខ​របស់​ប្រជាពលរដ្ឋ​ដោយ​ផ្តល់​ជា​រថយន្ត​ក្រុង​ដឹក​ជញ្ជូន​ពលរដ្ឋ​ទៅ​លេង​ស្រុក​កំណើត​ជួប​ជុំគ្រួសារ ដែលអាចសន្សំសំចៃថវិកាបានមួយចំនួនផងដែរ។

លោក ដាញ់ ដារិទ្ធ ប្រធានក្រុមការងារគោលដៅទី៤ នៅស្ថានីយរថយន្តក្រុងផ្លូវ២០០៤ ជាប់​របង​បញ្ជាការ​ដ្ឋាន​កងទ័ពអាកាស បានមានប្រសាសន៍ថា សម្រាប់សេវា​ដឹក​ជញ្ជូន​ប្រជាពលរដ្ឋ​ឥតគិត​ថ្លៃ​ក្នុង​គោលដៅរបស់លោក រួមមានទៅកាន់ខេត្តព្រះសីហនុ កំពត និងខេត្តកែប។ លោក​បាន​ឲ្យ​ដឹង​ថា គិតចាប់ពីព្រលឹម រហូតមកដល់ពេលនេះ ឃើញមានប្រជាពលរដ្ឋយ៉ាងច្រើនកុះករ និង​ទឹក​មុខ​សប្បាយ​រីករាយ ក្នុងការជិះរថយន្តក្រុងដោយមិនអស់ប្រាក់នេះ។

លោកបានបញ្ជាក់ថា រថយន្តក្រុងដឹកអ្នកដំណើរទាំងអស់ ពេល​ទៅ​ដល់​គោល​ដៅ​នឹង​នៅ​រង់​ចាំ​ដល់​ថ្ងៃ​ចេញ​ដំណើរត្រឡប់មករាជធានីភ្នំពេញវិញផងដែរ។ ចំពោះម៉ោង​ចេញ​ដំណើរ​ទាំង​ចេញ​ពី​រាជ​ធានី​ភ្នំពេញ​ទៅខេត្ត និងចេញពីខេត្តមករាជធានីភ្នំពេញ គឺដូចគ្នា ចាប់ពីម៉ោង ៦និង៣០​នាទី​ព្រឹក​ ដល់ម៉ោង ១១និង៣០នាទីព្រឹក។

សូមបញ្ជាក់ថា គិតចាប់ពីថ្ងៃទី១២ ដល់១៧ ខែមេសា ឆ្នាំ២០២៤នេះ រាជរដ្ឋាភិបាលកម្ពុជា តាម​រយៈរដ្ឋបាលរាជធានីភ្នំពេញ បានរៀបចំរថយន្តក្រុងសរុបចំនួន ៤៥៥គ្រឿង ដើម្បី​បម្រើ​សេវា​ដឹក​ជញ្ជូន​សាធារណៈឥ​តគិតថ្លៃ ក្នុងគោលបំណងដើម្បីសម្រួល និងសម្រាល​បន្ទុក​របស់​ប្រជាពលរដ្ឋ​ក្នុង​ការ​ធ្វើដំណើរទៅកាន់ស្រុកកំណើតនៅទូទាំងប្រទេស៕ អត្ថបទ៖ ឈិត បូរ៉ាវី