ក្រសួងសុខាភិបាលហ្កាហ្សា បានរាយការណ៍កាលពីថ្ងៃព្រហស្បតិ៍ (១១ មេសា) ថា ការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សា បានសម្លាប់ជនជាតិប៉ាឡេស្ទីន ៣៣.៥៤៥ នាក់ និងរបួស ៧៦.០៩៤ នាក់ទៀត ចាប់តាំងពីជម្លោះប៉ាឡេស្ទីន និងអ៊ីស្រាអែល បានផ្ទុះឡើងនៅថ្ងៃទី០៧ ខែតុលា ឆ្នាំ២០២៣ មក។

ក្រសួងបាននិយាយនៅក្នុងសេចក្តីថ្លែងការណ៍មួយថា ក្នុងអំឡុងពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ៦៣ នាក់ និងមនុស្ស ៤៥ នាក់ផ្សេងទៀតរងរបួស។

យោងតាមទីភ្នាក់ងារសារព័ត៌មានប៉ាឡេស្ទីន កងទ័ពអ៊ីស្រាអែល បានទម្លាក់គ្រាប់បែកយ៉ាងខ្លាំងក្លាទៅលើជំរំជនភៀសខ្លួន នូសៃរ៉ាត់ (Nuseirat) និងតំបន់ជុំវិញនៅកណ្តាលហ្កាហ្សាស្ទ្រីប តាំងពីយប់ថ្ងៃពុធ ដែលបណ្តាលឱ្យមនុស្សយ៉ាងហោចណាស់ ៥ នាក់ស្លាប់ និងជាច្រើននាក់ទៀតរងរបួស។

ទីភ្នាក់ងារព័ត៌មានចិនស៊ិនហួ ចេញផ្សាយកាលពីថ្ងៃព្រហស្បតិ៍ថា កងកម្លាំងអ៊ីស្រាអែល បានទម្លាក់គ្រាប់បែកលើលំនៅឋាន សាលារៀន និងវិហារអ៊ីស្លាម ក្នុងចំណោមកន្លែងផ្សេងទៀត ហើយកងកម្លាំងជើងគោករបស់ប្រទេសនេះ បានកាន់កាប់ទីតាំងនៅភាគខាងជើងនៃជំរំជនភៀសខ្លួន នូសៃរ៉ាត់។

នៅក្នុងសេចក្តីថ្លែងការណ៍ដែលចេញផ្សាយនៅថ្ងៃដដែលនោះ កងទ័ពអ៊ីស្រាអែលបាននិយាយថា ខ្លួនបានធ្វើប្រតិបត្តិការយោធានៅភាគកណ្តាលហ្កាហ្សា កាលពីយប់ថ្ងៃពុធ ដោយផ្អែកលើព័ត៌មានចារកម្ម ដោយមានគោលដៅបំផ្លាញហេដ្ឋារចនាសម្ព័ន្ធពាក់ព័ន្ធរបស់ក្រុមហាម៉ាស៕