មណ្ឌលសុខភាពអូរកណ្តៀរសែនជ័យ ត្រូវបានដាក់សម្ពោធឱ្យប្រើប្រាស់ជាផ្លូវការ ក្រោម​អធិបតី​ភាព ឯកឧត្តម វ៉ា ថន អភិបាលខេត្តក្រចេះ និងឯកឧត្តម ហឿ ស៊ីយ៉ែម ប្រធាន​ក្រុម​ប្រឹក្សា​ខេត្ត​ក្រចេះ ​រួមនិងឯកឧត្តម ង្វៀន វ៉ាន់យ៉ាញ់ អនុប្រធានគណៈកម្មាធិការ ប្រជាជនខេត្តប៊ិញយឿង នៃ​សាធារណ​រដ្ឋ​សង្គមនិយមវៀតណាម កាលពីថ្ងៃទី១១ ខែមេសា ឆ្នាំ២០២៤នេះ ។

មណ្ឌល​សុខភាព​អូរកណ្តៀរសែនជ័យ ស្ថិតនៅភូមិអូរកណ្តៀរសែនជ័យ ឃុំអូរកណ្តៀរ សែនជ័យ ស្រុកអូរ​គ្រៀងសែនជ័យ ខេត្តក្រចេះ គឺជាអគារមិត្តភាពក្រចេះ-ប៊ិញយឿង ដែលផ្តួច​ផ្តើម​កសាង​ដោយ​ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ។ ដោយអគារនេះ មាន​ចំនួន ១​ខ្នង​ និងកម្ពស់២ជាន់ មានប្រវែង ២២,៦ម៉ែត្រ គុណ ១០ម៉ែត្រ មានបន្ទប់ចំនួន ១៣បន្ទប់ និង​បន្ទប់​ទឹក​ចំនួន ៤បន្ទប់ ។ ក្នុងនោះ បន្ទប់រងចាំសម្រាលកូន ចំនួន ១បន្ទប់ បន្ទប់​សម្រាល​កូន​ចំនួន​ ១បន្ទប់ បន្ទប់ក្រោយសម្រាលចំនួន ១បន្ទប់ បន្ទប់ ពិគ្រោះព្យាបាលជំងឺទូទៅចំនួន ១បន្ទប់ បន្ទប់​ពិគ្រោះជំងឺចំនួន ១បន្ទប់ បន្ទប់ពិនិត្យផ្ទៃពោះ ចំនួន ១បន្ទប់ បន្ទប់ចាក់ថ្នាំបង្ការចំនួន ១បន្ទប់ បន្ទប់ឃ្លាំងឱសថចំនួន ១បន្ទប់ បន្ទប់ជំងឺរបេងចំនួន ១បន្ទប់ បន្ទប់វះកាត់តូច ចំនួន ១បន្ទប់ បន្ទប់ពន្យាកំណើតចំនួន ១បន្ទប់ និងបន្ទប់បុគ្គលិកពេទ្យចំនួន ២បន្ទប់ ហើយ​ត្រូវ​បាន​រដ្ឋបាល​ខេត្ត​ក្រចេះ បំពាក់សម្ភារ បិរក្ខាពេទ្យបានរួចរាល់ជាស្ថាពរ។

ឯកឧត្តម វ៉ា ថន អភិបាលខេត្ត បានថ្លែងអំណរគុណចំពោះខេត្តប៊ិញយឿង ដែលបានជួយ​ឧបត្ថម្ភ​គាំទ្រ​ដល់​ខេត្តក្រចេះជាច្រើន ដូចជា ការសាងសង់ស្ពានមិត្តភាព (ក្រចេះ-សុងប៊ែរ) សាងសង់​សាលា​មត្តេយ្យក្រចេះក្រុងចំនួន ១ខ្នង មាន ៤បន្ទប់ ចូលរួមចំណែក​ថវិកា​ក្នុង​ការ​សាង​សង់​ផ្សារ​សាមគ្គី​ក្រចេះ​ក្រុង សាងសង់ជួសជុល និងស្តារប្រឡាយ ទំនប់ អណ្តូងទឹក ស្រះទឹក ជាដើម ព្រម​ទាំង​បាន​ផ្តល់ គ្រឿងឧបភោគ បរិភោគជូនដល់ប្រជាជនក្រក្រីដែលជួបការលំបាក ពិសេស​បាន​ជួយ​ឧបត្ថម្ភ​គាំទ្រ នូវសម្ភារបរិក្ខាការពារកូវីដ-១៩ និងថវិកាជាច្រើន ព្រមទាំងការផ្តល់​អាហា​រូបករណ៍​ ដល់និស្សិត​ក្នុង​ខេត្ត​ក្រចេះ​សម្រាប់​បន្ត​ការ​សិក្សា​ថ្នាក់​បរិញ្ញាបត្រ​នៅ​ខេត្ត​ប៊ិញ​យឿង​ទៀត​ថែម​ទៀត។

ដោយឡែក វិស័យសុខាភិបាល នៅក្នុងស្រុកអូរគ្រៀងសែនជ័យ សព្វថ្ងៃនេះ មានមណ្ឌល​សុខភាព​ចំនួន ៤កន្លែង ។ ជាក់ស្ដែងគិតត្រឹមត្រីមាសទី១ ឆ្នាំ២០២៤ ប្រជាពលរដ្ឋ​មក​ពិនិត្យ​ពិគ្រោះ​ព្យាបាល​ជំងឺទូទៅសរុប ៦៧២នាក់ ក្នុងនោះ វះកាត់តូចៗចំនួន ១៨នាក់ និងជំងឺត្រចៀក ច្រមុះ និងបំពង់ករចំនួន ៩នាក់។ ស្រ្តីក្រីក្រមកពិនិត្យផ្ទៃពោះចំនួន ២៣៦នាក់ ស្រ្តីសម្រាល​កូន​ចំនួន​ ៤៦នាក់ និងក្រោយពេលសម្រាលកូនរួចចំនួន ៨៩នាក់ ដោយបាន​ធ្វើ​ការ​ផ្ដល់​សេវា​សុខាភិបាល​ជូន​ប្រជាពលរដ្ឋយ៉ាងមានប្រសិទ្ធភាព និងការផ្ដល់ប្រាក់​ឧបត្ថម្ភ​របស់​រាជ​រដ្ឋាភិបា​ល​ជូន​ដល់​ពួក​គាត់បានយ៉ាងទាន់ពេលវេលា និងពុំមានបាតុភាពអ្វីកើតឡើងគួរឱ្យកត់នោះឡើយ ៕ អត្ថបទ៖ សេង ម័រ