សង្ក្រាន្តវត្តភ្នំមកទល់ពេលនេះ កំពុងបង្ហាញសម្រស់យ៉ាងស្រស់ស្អាត ដើម្បីទាក់ទាញ​ទាំង​ភ្ញៀវ​ជាតិ និងអន្តរជាតិ ឱ្យមកចូលទស្សនា និងថតកម្សាន្ត។ សង្ក្រាន្ត​វត្តភ្នំ​ចាប់​ពីស្អែក​នេះ​ត​ទៅ​នឹង​មាន​រៀប​ចំ​នូវ ផ្ទាំងទស្សនីយភាព ក៏ដូចជាសកម្មភាពតាមបែបសាសនាប្រពៃណី និងសកម្ម​ភាព​កម្សាន្ត​ជាច្រើន ដើម្បីផ្ដល់ភាពសប្បាយរីករាយជូនប្រជាពលរដ្ឋ ដែលពុំបាន​ចាក​ចេញ​ទៅ​តាម​បណ្ដា​ខេត្ត។

នៅព្រឹកថ្ងៃទី ១២ ខែមេសា ឆ្នាំ ២០២៤នេះ ប្រជាពលរដ្ឋជាច្រើន ក៏ដូច​ជាវត្តមាន​ជន​បរទេស​មួយ​ចំនួន​ផងដែរ បានចូលមកទស្សនា ថតរូបកម្សាន្តនៅទីតាំងសង្ក្រាន្តវត្តភ្នំ។ គិតមក​ត្រឹម​ពេល​នេះ ​ក្រុមការងារនៃមន្ទីរវប្បធ៌មរាជធានីភ្នំពេញ ក៏កំពុងមមាញឹក​បង្ហើយ​ការ​ងារ​ដែល​នៅ​សល់​ឱ្យ​រួច​រាល់​ត្រឹមល្ងាចនេះផងដែរ។

លោក ពឿន ប្រុសពៅ ជាមន្ត្រីនៃមន្ទីរវប្បធ៌មរាជធានីភ្នំពេញ លើកឡើងថា ក្នុងរយៈពេល ៤ថ្ងៃ ខាងមុខនេះ សង្ក្រាន្តវត្តភ្នំ គឺមានការរៀបចំទាំងពិធីតាមបែបសាសនាប្រពៃណី ការ​សម្ដែង​ទម្រង់​សិល្បៈ​បុរាណ ដោយមានល្ខោនជាច្រើនទម្រង់ បូករួមទាំងការលេងល្បែងប្រជាប្រិយ ការរាំ​កម្សាន្ត​ផង​ដែរ។ លើសពីនេះ គឺមានការដាក់ពាងទឹកជុំវិញវត្តភ្នំ ដើម្បីអាច​ឱ្យអ្នក​ចូល​រួម​ស្រោច​ទឹក កាត់បន្ថយភាពក្ដៅពីអាកាសធាតុផងដែរ។ លោកក៏សូមអំពាវនាវ ដល់ពលរដ្ឋ អញ្ជើញ​មក​កម្សាន្ត​ឱ្យ​បាន​កុះករទាំងអស់គ្នា ចាប់ពីថ្ងៃស្អែកនេះទៅ។

សម្រាប់ប្រជាពលរដ្ឋ ក៏ដូចជាជនបរទេស ដែលបានចូលមកកម្សាន្តនៅទីតាំងសង្ក្រាន្តវត្តភ្នំ នៅ​ថ្ងៃ​នេះ ​ម្នាក់ៗបង្ហាញនូវទឹកមុខសប្បាយរីករាយ និងពេញចិត្ត​ចំពោះ​ការ​រៀបចំ​តុបតែង​លម្អរ​នៅ​ឆ្នាំ​នេះ​។​ ពួកគេសប្បាយចិត្តដែលមានការរៀបចំកម្មវិធីសង្ក្រាន្តគ្រប់ទិសទី ដើម្បីលើក​ស្ទួយ​វប្បធ៌​ជាតិ​ និងផ្ដល់ភាពសប្បាយរីករាយជូនប្រជាពលរដ្ឋ។ ពួកគេជឿជាក់ដែរថា សង្ក្រាន្តវត្តភ្នំ​នឹង​ផ្ដល់​ភាព​សប្បាយ​រីករាយជាខ្លាំង សម្រាប់ប្រជាពលរដ្ឋដែលពុំបានចេញទៅតាមបណ្ដាខេត្ត។ ពួកគេ​ក៏​នឹង​មក​ចូលរួមកម្សាន្តផងដែរ។។

ពិធីបុណ្យចូលឆ្នាំប្រពៃណីជាតិខ្មែរ នៅឆ្នាំនេះ មានរយៈពេល ៤ថ្ងៃ ដោយចាប់ផ្ដើមពីថ្ងៃទី ១៣ រហូត​ដល់​ថ្ងៃទី ១៦ ខែមេសា ឆ្នាំ ២០២៤។ តាមរាជធានី-ខេត្ត សុទ្ធតែមានការរៀបចំ កម្មវិធី​ដើម្បី​ផ្ដល់​ភាពសប្បាយរីករាយជូនបប្រជាពលរដ្ឋ៕ អត្ថបទ៖ គឹមហុក